“Libri i Zi i Rilindjes”, Berisha: Do të bëjmë një audit të tipit Elon Musk, paratë do t’u kthehen shqiptarëve!

“Libri i Punëve të Mira” dhe “Libri i Punëve të Zeza” faktojnë se Shqipëria Madhështore është një projekt 100 përqind i realizueshëm, tha sot Kryetari i Partisë Demokratike, Sali Berisha, me rastin e prezantimit të dokumentit të detajuar të Departamentit Brain Gain me dështimet dhe skandalet e Qeverisë Rama, “Libri i Zi i Rilindjes”.

Kryetari i Partisë Demokratike sot u zotua për një reformë të sistemit të drejtësisë me ndihmën e Komisionit të Venecias dhe aleatëve, dhe, një audit të tipit Elon Musk në mënyrë që t’u kthehen paratë shqiptarëve.

“Së pari një mirënjohje të pakufishme anëtarit dhe drejtuesit të Departamentit Brain Gain, departament i një shprese të madhe për PD-në dhe shqiptarët.
Departament i përbërë nga burra, gra, djem dhe vajza, nga të rinj atdhetarë, të përkushtuar, të cilët kudo që janë kanë frymëzim dashurinë e tyre për vendin, dëshirën e tyre që dihet që kanë përfituar eksperiencat, t’i vënë në shërbim të vendit të tyre. T’i vënë në shërbim të PD-së.
Fillimi i punës së këtij departamenti ishte një projekt midis realizimit dhe jorealizimit. Por është në meritën e madhe të Andi Mustafajt, drejtuesit të tij dhe të gjithë anëtarëve të këtij departamenti që e shndërruan atë me përkushtimin, ekspertizën në një departament të vërtetë Brain Gain, për PD-në dhe shoqërinë shqiptare.

Dhe unë, duke shprehur mirënjohje të pakufishme ndaj tyre, i garantoj se në udhëtimin e saj, PD beson dhe është e vendosur që ata të marrin rolin që meritojnë, rolin që shqiptarët presin nga të rinjtë dhe të rejat e shkolluar, bijtë dhe bijat e tyre të mirëshkolluar, që do vijnë dhe do punojnë për të ndihmuar në projektin më të mirë që shqiptarët kanë pasur ndonjëherë para tyre, projektin e Shqipërisë Madhështore.
Të dashur miq, puna e këtij departamenti është një punë në themelet e asaj Shqipërie që ne duam të ndërtojmë.
Dhe cilido që dëshiron të kuptojë programin e PD-së për Shqipërinë Madhështore, i sugjeroj të lexojë dy veprat themelore të këtij departamenti, ‘Punët e Mira të PD’ dhe ‘Librin e Zi’ të regjimit të sotëm.
Duke lexuar këto dy vepra, programi për Shqipërinë Madhështore, që kjo madhështore të duket distancë, të duket e ekzagjeruar, të duket edhe ndonjëherë edhe më shumë se e ekzagjeruar, të bëhet real, të bëhet plotësisht i kapshëm, të bëhet frymëzues për çdo demokrat dhe qytetar,” tha Sali Berisha duke e kondieruar këtë libër si autopsi të këtij regjimi 12 vjeçar që shkatërroi materien tonë kombëtare.

“Sot ne jemi këtu për librin e tyre ‘Punët e zeza’. Kanë zgjedhur një titull shumë të merituar. Kanë zgjedhur ndoshta të vetmin titull që meritonte ky subjekt, kjo tematikë, kjo çështje. Diktaturat meritojnë vetëm libra të zi.
Ne këtu në Shqipëri kemi rënë në një fatkeqësi të dyfishtë. Së pari, në një diktaturë. Së dyti, në një diktaturë, të cilën Europa kurrë nuk e ka pasur. Kontinenti ynë ka njohur të gjithë format e diktaturave. Ka njohur diktatura teokratike në mesjetën e tij dhe më vonë. Ka njohur diktaturat naziste, komuniste, ka njohur edhe juntat ushtarake. Por nuk ka njohur diktaturat e bandave, e drogës, e krimit.
Kur 20 vite më parë lexoja Samuel Hantigtonin, një libër të tij për diktaturat, gjej aty se ai shkruante se forma më e zezë e diktaturës, më e zezë se sa diktatura naziste, komuniste apo juntat, është diktatura e bandave, diktatura e drogës. Dhe ai jepte argumentet e veta.
Nuk e mendoja kurrë që do vinte një ditë që do përballemi në Shqipëri me një diktaturë të tillë.
Vështirësia jonë është e madhe sepse ky lloj regjimi nuk është njohur në Europë.
Në Europë të flasësh për diktaturë komuniste, naziste, por edhe teokratike, ka një memorie. Por Europa nuk ka asgj të regjistruar për diktaturat e bandave, e drogës.
Diktatori i Tiranës, i cili nuk duhet të harrojmë kurrë ta themi, është pasardhës direkt i një xhelati të diktaturës komuniste, që firmosi, krahas firmës së Ramiz Alisë, për të varur në litar një poet mendjendritur, një poet të jashtëzakonshëm siç ishte Havzi Nela.
Kristaq Rama ishte skulptor, ishte i shkolluar, ishte intelektual. Por ishte skulptor kriminel, intelektual kriminel, ndaj edhe firmoste. Kishte intolerancë të plotë ndaj fjalës së lirë, ndaj kundërshtimit, njëlloj si Edi Rama të njëjtën intolerancë ndaj opozitës, ndaj TikTokut.
Pra, ne kemi një diktator i cili jashtë Shqipërie paraqitet herë si hokatar, me atlete të bardha, paraqet zhgarravina, flet për sport. Kurse brenda ai nuk respekton asnë ligj, as Kushtetutë. Ai njëlloj si Zaedi i Tunizisë arreston tre liderët e partive kryesore opozitare. Merr mandate me gjykata. Përdor prokurorinë politike si armë në duart e tij.
Pra, këto janë vështirësi të mëdha tonat, por prapë këta djem dhe vajza dhe ne së bashku kemi zgjedhur të luftojmë, kemi zgjedhur të qëndrojmë seps këto janë të vërtetat më të hidhura për shqiptarët, por janë të vërteta të hidhura edhe për Europën. Kështu që i parë në këtë kontekst, ky libër merr vlera të jashtëzakonshme.
Ky libër i hartuar nga intelektualë të shquar që jetojnë në vende të lira, ka një avantazh shumë të madh në analizën e tij, në fjalorin e tij, në paraqitjen e tij. Vërtet mund të thotë dikush se është propagandë. Është gjithçka e bazuar në të vërteta.
Në të vërtetë është autopsia e këtij regjimi 12-vjeçar që shkatërroi materien tonë kombëtare më shumë se çdo luftë, më shumë se çdo pushtues, më shumë se çdo diktaturë e mëparshme,” tha lideri i opozitës duke konstatuar se “Libri i Punëve të Mira” dhe “Libri i Punëve të Zeza” faktojnë se Shqipëria Madhështore është një projekt 100 përqind i realizueshëm.

“Më parë theksova se këto dy libra janë thelbësore për të kuptuar programin e PD të Shqipërisë Madhështore, për t’u frymëzuar në këtë program se në të vërtetë është programi më i jashtëzakonshëm që është paraqitur ndonjëherë.
Cilido që i hedh një sy Librit të Punëve të Mira, i cili duhet të jetë libri i çdo demokrati, i çdo mbështetësi të PD, sepse është trashëgimi e çdo demokrati, e çdo mbështetësi të PD, kupton se ky projekti i Shqipërisë Madhështore, aq sa duket i largët, aq qenka i mundshëm, aq qenka real. Sepse kjo parti në të shkuarën e saj ka disa nga momentet më madhështore në histori.
Ka momente madhështore si themeluese e pluralizmit politik në vendin në monist të planetit.
Ka moment madhështor ndërtimin e institucioneve demokratike dhe ekonomisë së tregut në vendin më hiperkolektivist të planetit. Ka moment madhështor nxjerrjen e shqiptarëve nga honet, nga grupi i vendeve me të ardhura më të ulëta në botë, ku Shqipëria renditej me Ugandën dhe Angolën, në grupin e vendeve me të ardhura të mesme të larta.
Ka momente kur Shqipëria nga vendi i pasigurt, do shndërrohej në vendet më të sigurta të rajonit dhe do anëtarësohej në NATO. Askush nuk mund të mohojë se anëtarësimi në NATO ishte një moment madhështor i historisë kombëtare.
Pra, cilido që lexon librin e këtij departamenti për punët e mira të PD-së, e kupton se projekti i Shqipërisë Madhështore është një projekt në duart tona. Është një projekt plotësisht i realizueshëm.
Jo vetëm kaq, por cilido që lexon Librin e Punëve të Zeza, nuk gjen aty vetëm veprat e zeza të kësaj qeverie, të kësaj diktature, por aty nëpër rreshta lexon edhe të gjitha potencialet e mëdha që ekzistojnë, që grabiten, që plaçkiten, që keqpërdoren, por që duhet t’u kthehen qytetarëve shqiptarë në projektet e Shqipërisë Madhështore.
Jo të paktë janë ata që shtrojnë pyetjen: ku do gjenden këto para? Këto premtime si do mbahen?
Dhe nuk ka gjë më normale.
Është e vërtetë se ne kurrë nuk kemi premtuar gjëra që nuk i kemi bërë. Por e lëmë mënjanë këtë.
Paratë janë para dhe qytetarët duhet ta dinë se ku do gjenden.
Cilido që lexon Punët e Zeza të këtij regjimi, e sheh se paratë janë, por u vidhen shqiptarëve, u plaçkiten shqiptarëve, nuk u jepen shqiptarëve.
Pra, në pamje të parë duket sikur kemi propozuar një projekt të largët. Në fakt është një projekt 100 përqind i realizueshëm. Nuk do bëjmë asgjë tjetër fillimisht, si hapi i parë do u kthejmë paratë shqiptarëve.
Qytetarët shqiptarë duhet ta dinë se ato para janë të tyre, nuk dalin nga xhepat tonë, nuk dalin nga kontot e qeveritarëve, jo, janë të gjithë paratë e djersës dhe mundit të tyre që i paguajnë taksa.
Çdo qeveri e përgjegjshme, çdo fillimviti buxhetor, i ndan një pjesë për qytetarët, të tjerat për shërbimet, të tjerat për infrastrukturën.
Kurse kjo qeveri i ka ndarë, 57 miliardë të gjitha grabitje, grabitje, grabitje.
Kjo qeveri e paraqet si katastrofë propozimet tona për rritjen e pensioneve. Si mor qenkan katastrofë? Mendon se do gënjesh ata njerëz të ndershëm që kanë shkrirë jetën e tyre?
Po ai kolegu i tij në Kosovë pse merr 100 milionë euro nga buxheti dhe i kalon në fondin e tyre? U përmbys Kosova?

Dhe ky mashtron, mashtron, mashtron.”

Me këtë rast, Kryetari i Partisë Demokratike premtoi një reformë të sistemit të drejtësisë me ndihmën e Komisionit të Venecias dhe aleatëve, si dhe një audit të tipit Elon Musk në mënyrë që t’u kthehen paratë shqiptarëve.

“Këto ditë po lexoja një fjalë të presidentit Trump. Çfarë thoshte? Presidenti Trump thoshte më i keqi është gënjeshtari. Më i keqi se çdo njeri tjetër. Të rrëmben kohën dhe i numëronte me radhë të këqijat e gënjeshtarit.
Po në qoftë se e përfytyron në një moment këto 12 vite, këta janë piramida më e madhe e mashtrimit në histori pas Enver Hoxhës.
Ndaj dhe Libri i Zi, jo vetëm u paraqet shqiptarëve të zezat e këtij regjimi, por Libri i Zi paraqet para shqiptarëve potencialet e mëdha që ekzistojnë për PD-në, domosdoshmërinë e një auditi të tipit Elon Musk në mënyrë që t’u kthehen paratë shqiptarëve dhe Shqipërisë.
Dhe unë u garantoj se kjo do ndodhë.
Ndaj dhe në programin tonë, shtyllë kryesore krahas paketës së dhembshurisë, krahas Made in Albania, krahas Shqipërisë Madhështore, kemi përcaktuar pastrimin e shtëpisë tonë. Kjo është shtyllë themelore.
Në qoftë se ne nuk bëjmë pastrimin e shtëpisë tonë, ne kemi mashtruar shqiptarët. Ne do bëjmë pastrimin e shtëpisë tonë. Ne do rendim pas çdo qindarke të vjedhur qytetarëve shqiptarë dhe do ua kthejmë atyre. Të gjitha pasuritë e vendosura mbi paratë e vjedhura do u kthehen atyre.
Të gjitha pasuritë e krimit do u kthehen atyre. Askush nuk ndalet. Ne do ndalemi.
Narkoeuro. Euro, kjo monedhë e bekuar, në Shqipëri është shndërruar në një monedhë ndëshkuese. Shkatërron për shkak të drogës të gjitha bizneset e eksporteve. Mbyllen njëra pas tjetrës.
Zero tolerancë ndaj krimit të organizuar dhe narkoeurove,” tha Berisha duke bërë dhe zotimin solemn për një Reformë të Sistemit të Drejtësisë me ndihmën e Komisionit të Venecias.

“Shqipëria nuk mund të jetë kurrë vendi i shtetit ligjor, nuk mund të jetë kurrë vend i besueshëm për qytetarët e saj dhe investitorët pa një drejtësi që funksionon mbi parimet ndërkombëtare të sistemit të drejtësisë.
Pa një drejtësi të pavarur, pa një drejtësi të varur në ligj, të varur në Kushtetutë. Drejtësia politike shqiptare përbën rrezikun më madhor për të sotmen dhe të ardhmen e kombit. Askush të mos mendojë se kjo drejtësi dallon nga një drejtësi e diktaturës.
Miqtë e mi, ata që kanë jetuar vite e dekada në diktaturë, e dinë mirë se para skuadrave të pushkatimit kalonin edhe kriminelët. Nuk mund të themi se diktatura e shkuar kishte tolerancë ndaj krimit. E them këtë sepse duke u nisur nga disa ndëshkimet që u bëhen zyrtarëve të korruptuar, duan të përligjin përdorimin e saj si shpatë politike kundër kundërshtarëve.
Po kjo është diktaturë.
Duan të përligjin pikërisht për këtë, ndëshkimin e një populli të tërë.
U them këtyre zotërinjve, se kjo reformë e Xhorxh Sorosit i la shqiptarët, iu privoi qytetarëve shqiptarë të drejtën e një procesi ligjor të ndershëm. Nuk ka proces ligjor të ndershëm nëse pret 15 vite për të marrë vendimin. Dhe kjo ndodh në mes të Europës, kjo ndodh para projektorëve të saj.
Dhe u dashka ne të pranojmë të lëmë qytetarët tanë pa sistem drejtësie për një akt korrupsioni ndërkombëtar të paparë? Kurrë.
Ne nuk humbasim besimin tonë tek Komisioni i Venecias. Jo. Tek institucionet evropiane dhe amerikane.
Por reformën e drejtësisë e bënë ata që shkruajtën Kushtetutën e vitit 1974. Janë sorosianët më të thekur të rajonit dhe Tiranës. Janë ekspertë mashtrues, falsifikatorë të huaj. Me dokumente!
Dhe tani kjo mbrohet si e shenjtë. Mos na shani reformën.
Kujt ia thonë? Po pse, mund të sakrifikohet e drejta e një populli për të drejtën e një procesi ligjor të ndershëm?
Po a e dini ju se çfarë po ndodh? Në qoftë se para 3 vitesh kishte 130 mijë dosje stok, tani stoku është 150 mijë. Ju mor të bërtisni, u them këtyre që bërtasin nga mëngjesi gjer në darkë se po sulmohet sistemi, jo mor, po mbrohen qytetarët. Se ky është një krim i shëmtuar, të lësh një popull pa proces gjyqësor të drejtë, i ke bërë gjëmën atij populli. Ndaj dhe reforma do bëhet. Ne do reformojmë.
Libri i Zi i paraqet këto. Nuk është çështje hakmarrje, por çështja është se prokurori politike është diktaturë.
A e dini ju se nuk vijnë më investitorët e huaj në Shqipëri?
Në atë Librin e Punëve të Mira do gjeni se investimet e huaja nga viti 2006-2013 u rritën me 300 përqind. Të gjitha punët e mëdha publike i bënë kompanitë e mëdha evropiane dhe amerikane. Dhe sot qëndrojnë që të gjitha dhe nuk shemben. Dhe janë ndërtuar me një çmim gjer 10 herë më të ulët se sa sot.
Po pse? Sepse kishte garë. Se kishte garanci ligjore, juridike. Kishte sistem juridik. Fragjil, por funksiononte dhe investitori besonte se çdo padrejtësi do kishte një gjykatë. Kurse sot e di që do presë 15 vite, ndaj nuk vijnë investitorët e huaj.
U ndala pak më gjatë në këtë çështje se është një çështje themelore për ne në projektin e Shqipërisë Madhështore,” tha Kryetari i Partisë Demokratike, Sali Berisha, duke përfunduar:
“Siguroj se një reformë e sistemit të drejtësisë me Komisionin e Venecias dhe miqtë e aleatët më të mirë të Shqipërisë, institutet respektove që merren me të drejtën, do bëhet. Dhe prapë të këqijat një popullit nuk e vënë para kurrë.
Ai, pavarësisht rrethanave në të cilat ndodhet, kur e vendos, vendos të dalë në krye.
Dhe ne do dalim në krye dhe projektin e Shqipërisë Madhështore do e bëjmë realitet për çdo shqiptar.
Edhe njëherë, ftoj të gjithë demokratët që t’i kenë librat e tyre të ditës Librin e Punëve të Mira të PD dhe Librin e Punëve të Zeza të narkodiktaturës së Edi Ramës.”