Liderët e Ballkanit Perëndimor sot takohen në Bruksel

Liderët politikë të gjashtë vendeve të Ballkanit Perëndimor sot pritet të takohen në Bruksel.

Së bashku me Presidentin e Këshillit Europian, Charles Michel, Presidenten e Komisionit Europian, Ursula von der Leyen, Kryeministrin e Kroacisë si kryesuese e radhës së BE, Andrej Plenkoviç, dhe Përfaqësuesin e Lartë për Politikë të Jashtme dhe Siguri pranë BE, Joseph Borrell, ata do të zhvillojnë një takim të parë joformal për t’u përgatitur për samitin e BE-së për Ballkanin Perëndimor që do të zhvillohet në muajin maj të këtij viti në Zagreb.

Ndërkaq nesër, gjashtë liderët e Ballkanit Perëndimor do të takohen sërish në Bruksel për Konferencën Ndërkombëtare të Donatorëve për Shqipërinë, e cila zhvillohet në hapësirat e Komisionit Europian.

Qëllimi i konferencës është mbështetja e përpjekjeve të rindërtimit në Shqipëri pas tërmetit që goditi vendin në nëntor të vitit të kaluar.