Lideri i ri i PPE, Donald Tusk: Luftë populistëve!
Presidenti i Këshillit Evropian në ikje, Donald Tusk është Presidenti i ri i Partisë Popullore Europiane, PPE, i cili premtoi luftë kundër populistëve.
Presidenti i parë i PPE nga Evropa lindore dhe qendrore, Donald Tusk, për të cilin votuan 491 delegatë të Kongresit të PPE në Zagreb dhe 37 ishin kundër, do të zëvendësoj francezin Joseph Daul i cili ishte në krye të kësaj partie nga fundi i vitit 2013.
Tusk, 62 vjeç, ishte kandidati i vetëm për kreun e grupit më të madh në Parlamentin Evropian ndërsa mandati në postin e Presidentit të Këshillit Evropian i skadon në fund të këtij muaji, ku ishte zgjedhur për dy herë në vitin 2014 dhe 2017.
Në luftë kundër populistëve
“Më mirë është të jesh President i PPE se sa Ish-President i Këshillit Evropian,” tha duke bërë shaka Donald Tusk pasi u shpallë rezultati i votimit ndërkohë që kishte paralajmëruar se është ngopur të jetë një burokrat evropian dhe do niset në luftë kundër populistëve.
“Nga njëra anë janë partitë e populizmit të papërgjegjshëm, dhe nga ana tjetër partia jonë e përgjegjshmërisë popullore,” tha ai para përfaqësuesve të 40 shteteve duke shtuar:
“Pas pesë viteve jam ngopur të jem burokrati kryesor evropian. Unë jam i gatshëm për luftë, shpresoj të jeni edhe ju.”
Tusk tha se frika ka rolin kryesor në politikë dhe se për shkak të krizës me emigrantë dhe sulmeve terroriste, gjatë viteve të fundit njerëzit kanë kërkuar ndjesinë e sigurisë.
“Për këtë arsye, zemrat e tyre i bëjnë shumë shpejtë për vete ata që në zë thërrasin ‘ngrihuni, e bëni vendin tuaj përsëri të madh, riktheni kontrollin’,” tha Tusk duke pasur parasysh refrenet që përdorin liderët populistë në Evropë.
Por Presidenti i ri i PPE mendon se të drejtën për të qeverisur e kanë vetëm ata që dëshirojnë dhe kanë mundësi që njerëzve t’u ofrojnë ndjenjën e sigurisë, duke ruajtur njëkohësisht liritë dhe të drejtat e tyre.
“Me asnjë kusht nuk mund t’a lejojmë zonën e lirisë dhe rendit në duart e populistëve, manipulatorëve dhe autokratëve, që njerëzit i shtyjnë të besojnë se liria nuk mund të shkon nga dora në dorë me siguri. Se mbrojtja e kufijve dhe territoreve tona nuk mund të shkojnë së bashku me demokracinë liberale dhe sundimin e ligjit,” tha Tusk.
“Vlerat siç janë liria e qytetarit, sundimi i ligjit dhe sjellja publike e mirë nuk do ti viktimizojmë në altarin e rendit dhe sigurisë, sepse për këtë nuk ka nevojë,” tha Presidenti i ri i PPE duke përfunduar:
“Ata që nuk mund ti pranojnë, de facto përjashtohen nga familja!”
Ndryshe, PPE edhe pse në zgjedhjet e fundit ka fituar 39 mandate më pak se në vitin 2014, me 182 mandatet është grupi më i madh në Parlamentin Evropiam. Dhe, përkundër popullaritet në rritje të partive euroskeptike dhe eurofobe, vala populiste nuk e ka përmbytur Evropën.
Donald Tusk, aktivist i Solidarnostit në vitet ’80 u bë kryeministri më jetëgjatë në Poloninë postkomuniste (2007-2014). Ishte njëri ndër themeluesit e partisë së qendërs Platforma qytetare, anëtare e PPE në krye të së cilës ishte nga viti 2003 deri në vitin 2014.
