“Lidhja e Prizrenit”, Presidentja Vjosa Osmani: Model për lirinë e Kosovës!

Lidhja Shqiptare e Prizrenit ishte thirrje për bashkim kombëtar në kohën kur po rrezikohej ekzistenca e këtij kombi të lashtë, tha sot Presidentja e Kosovës, Vjosa Osmani, sot në Prizren në ceremoninë e 145-vjetorit të Lidhjes Shqiptare të Prizrenit ndërsa foli për rëndësinë e kësaj lidhjeje në historinë e popullit shqiptar për liri.

“Vendi simbolizon vendin e përafrimit të bashkimit të shqiptarëve drejt një qëllimi madhor, atë të lirisë kombëtare, ku i bashkoi e artikuloi kërkesat shqiptare, nga rrezikimi i copëtimit të trojeve shqiptare nga fqinjët,” tha Presidentja Osmani duke shtuar se ata kërkuan jetësimin e shtetit të shqiptarëve si instrument themelor të jetesës kombëtare.

“Pikërisht në këtë datë, më 10 qershor të vitit 1878, patriotët shqiptarë  u tubuan nga të katër anët e dëshmuan vetëdije të lartë kombëtar, duke mos pranuar që të mbeteshin nën okupim por as të mbeteshin pre e shteteve fqinje gllabërues.

Ajo shprehu qartë jo vetëm përcaktimin e shqiptarëve për shtetin e pavarur si instrument I rëndësishëm politik për realizimin e aspiratave të tyre, por edhe orientimin e tyre drejt vlerave të larta qytetëruese perëndimore”, theksoi ajo, duke shtuar se kjo lidhje tregoi vetëdije të lartë shtetërore duke u shndërruar në platformë të fuqishme nacionale.

“Kësisoj ajo shtroi platformën politike për një shtet të shqiptarëve që bën kryengritje të përgjithshme dhe motivuan për lidhje dhe lëvizjen e cila do ta përmbyllte procesin e shpalljes së pavarësisë se Shqipërisë”, theksoi Presidentja e Kosovës, Vjosa Osmani, dukepërfunduar.

“Lidhja ka shërbyer si model i përhershëm nga i cili janë frymëzuar breza të tërë intelektualësh, dijetarësh, shkrimtarësh e politikanësh e nga i cili kanë buruar projekte të tjera përbashkuese të tipit nacional kulturor, sikurse ai i vitit të ’90-ta për lirinë dhe pavarësinë e Kosovës.”

Presidenti i Republikës së Shqipërisë, Bajram Begaj, tha se historia e kombit tonë të lashtë është e pasur me monumente, të cilat na mbushin me krenari për atë çka ne, shqiptarët, jemi dhe vlerat që ne përfaqësojmë .

“Lidhja shqiptare e Prizrenit” është një prej këtyre ngjarjeve të jashtëzakonshme, ku patriotët vizionar, u bashkuan për të krijuar një qëndresë mbarëshqiptare kundër shtypjes dhe sundimit.

Ishte kjo lidhje që punoi më të gjitha forcat për ta afirmuar me kohë kombin tonë, dhe për të kundërshtuar copëzimin e trojeve etnike shqiptare,” tha Begaj duke përfunduar”

“Kjo besëlidhje që projektoi krijimin e një shteti shqiptar të lirë dhe të pavarur!”

Pasi foli për rëndësinë historike të ngjarjes së Lidhjes së Prizrenit, Kryeministri i Kosovës, Albin Kurti vuri në pah ngjashmëritë e problematikës, sikundër atëherë, ashtu edhe sot, duke vënë theksin te Rusia.

“10 Qershori është po aq i rëndësishëm sa 28 nëntori dhe 17 shkurti në historinë tonë kombëtare”, deklaroi Kurti, derisa shtoi se kjo datë konsiderohet si një fillim i një udhëtimit të strukturuar politik të shqiptarëve, i cili vazhdon edhe sot.

“Ne ende kemi çka të mësojmë nga filozofia politike të Sami Frashërit dhe nga praktika diplomatike e Abdyl Frashërit, nga organizimet ushtarake e Sylejman Vokshit e Ali Pashë Gusisë,” tha Kryeministri Kurti, duke vazhduar duke shtuar se rruga e jonë e tashme është rrugë e dikurshme e Lidhjes së Prizrenit ndërsa përfundoi:

“Me rëndësinë e saj politike e historike ‘Lidhja e Prizrenit’ na ka bashkuar edhe ne si krerë institucionesh sikurse që ka bashkuar parinë shqiptare atëherë.”

Ndryshe, Lidhja e Prizrenit ishte një organizim politik i parisë së katër vilajeteve që ishin shumicë shqiptare në Perandorinë Osmane. Ajo u themelua zyrtarisht më 10 Qershor 1878 në xhaminë Bajraklie të Prizrenit, qytet ku deri një vit përpara ishte qendra e Vilajetit të Kosovës.

Traktatet e Shën Stefanit dhe Berlinit u kishin caktuar territore të banuara edhe nga shqiptarë shteteve të tjera pas Luftës Ruso-Turke dhe për këtë arsye shqiptarët u përgatitën për rezistencë kombëtare.

Sot, 145-vjetori i Lidhjes Shqiptare të Prizrenit përkon me 24-vjetorin e çlirimit të Kosovës.