Ligji për Magjistratët, PS shpreson te votat e opozitës/ Ja çfarë pritet të ndodhë në Kuvend…

Kuvendi do të mblidhet sot në seancë plenare, ndërsa një nga pikat e rendit të ditës është edhe votimi i ligjit për Magjistratët e rinj. Ky ligj ishte në rendin e ditës për t´u miratuar në seancën e kaluar, por u tërhoq nga mazhoranca socialiste për shkak të mungesës së 84 votave që duhen për miratimin e tij. Socialistët përmes kreut të Grupit Parlamentar të PS-së, Taulant Balla, deklaruan se janë në bisedime me LSI-në, por një gjë e tillë u mohua nga drejtuesit e kësaj partie.

Dje, Balla i drejtoi një apel opozitës për të bashkuar votat për miratimin e draftit, por shanset që kjo të ndodhë janë zero. Kjo për faktin se opozita ka deklaruar se nuk ka ndërmend të bëhet pjesë e asaj që e quajnë farsë të Edi Ramës për kapjen e sistemit të drejtësisë. Mes palëve politike, në mazhoranncë dhe në opozitë, ka një mungesë besimi lidhur me sistemin e drejtësisë, ku PD-LSI akuzojnë Kryeministrin Rama se ka kapur sistemin, duke emëruar Kryeprokuroren e Përkohshme.

Pritet që në seancën e sotme, ashtu si edhe në atë të së enjtes së javës së kaluar deputetët e opozitës të mos marrin pjesë, ndërsa socialistët duket se shpresojnë në një rrjedhje votash. Nga zgjedhjet parlamentare të 2017-ës, Edi Rama mori 74 mandate deputetësh, por në tërësi ai numëron 79 mandate në favour të tij, kjo për shkak se 3 deputetë të PDIU, Tom Doshi i PSD dhe Robert Bitri i LSI, votojnë pro nismave të Qeverisë.

Pra për miratimin e ligjit për Magjistratët, Ramës i duhen të paktën 5 vota nga opozita, nëse votat e PS dhe deputetëve të tjerë pro tij, janë në unison. Situatat politike dhe parlamentare në Shqipëri kanë treguar se rrjedhjet e votave janë një gjë krejt normale, çka duket se ka detyruar drejtuesit e dy partive opozitare që të zgjedhin rrugën për të qëndruar jashtë Kuvendit, të paktën në momentin e votimit.

Opozita akuzon mazhorancën se manipuloi votimin në ligjin e Teatrit, ku të paktën një deputet që rezulton se nuk ka qenë në sallën e Kuvendit, të ketë votuar pro draftit. Por  ky  pretendim i tyre është hedhur poshtë nga PS, duke bërë që të paktën PD të ketë një marrëdhënie të kushtëzuar me Kuvendin.