Ligji për Magjistraturën, Hysi e PS ka një apel për opozitën: Ejani të shmangim kolapsin…

Vasilika Hysi, nënkryetarja socialiste e Kuvendit, i ka drejtuar një apel deputetëve të opozitës, që të votojnë ligjin për Magjistraturën, i cili i hap rrugën punësimit të magjistratëve të rinj në sistemin e drejtësisë. E hëna e 23 korrikut është afati i fundit për këtë sesion parlamentar për miratimin e ligjit, i cili gjithashtu u mundëson të rinjve që të ndjekin studimet në Magjistraturë. Opozita është shprehur se nuk ka ndërmend të miratojë një ligj që i jep të drejtën Kryeministrit të kapë edhe më tej drejtësinë.

”Vetting-u po ecën dhe po ecën shpejt. Brenda korrikut do të kemi rezultate shumë më të mëdha. Nga ana tjetër kemi një grup studentësh të shkëlqyer që dëshirojnë të fillojnë magjistraturën. E dyta, kemi një grup tjetër magjistratësh që presin të fillojnë të punësohen.

Nëse ne themi që ne nuk duhet të bllokojmë, ta çojmë sistemin në kolaps, ne duhet të kontribuojmë. Ne duhet të jemi të përgjegjshëm. Ne duhet tu japim mundësinë të punësohen këtyre magjistratëve ekselentë. Dua tu bëj një thirrje të gjithë të rinjve dhe të rejave që studiojnë jashtë. Mesatarja për të konkurruar në Shkollën e Magjistraturës nuk është 8, por 6.2.

Në radhë të parë, duke ju bërë apel kolegëve të mi të opozitës për të ardhur dhe për të votuar ndryshimet në ligj për tu dhënë mundësi në shtator kandidatëve fitues të fillojnë shkollën, dhe nga ana tjetër, ftoj të gjithë studentët që kanë studiuar jashtë, të vijnë dhe të kontribuojnë në Shqipëri”,-tha Hysi për gazetarët.