Ligji për Teatrin/ KE: Ligji nuk shkel MSA-në por “Fusha” shkel Ligjin
Ligji për Teatrin përfundimisht mori damkën edhe nga Komisioni Evropian: është korruptiv.
Pse nuk u shqyrtua në parlament pas u kthye nga presidenti, e paralajmëroi Gramoz Ruçi, dhe përgjigja erdhi nga Brukseli.
Pas ekspertizës së kërkuar nga Komisioni Evropian, Shefja e Njësisë për Shqipërinë dhe Bosnje Hercegovinën në Drejtorinë e Përgjithshme për Politikat Evropiane të Fqinjësisë dhe Negociatat e Zgjerimit, Michela Matuella, sqaron se Komisioni Evropian nuk ka asnjë kompetencë për të vlerësuar përputhshmërinë e Ligjit Special me kuadrin ligjor aktual të Shqipërisë, por nga ana tjetër, ajo shprehet se nuk ka asnjë shkelje të Marrëveshjes së Stabilizim Asociimit.
“Artikulli 74(3) i MSA-së i referohet dhënies së aksesit të barabartë kompanive private që duan të lidhin kontrata, duke u bazuar në Ligjin Shqiptar mbi Prokurimet Publike dhe jo mbi acquistë e Bashkimit Evropian. Ndonëse, në këtë pikë nuk vërejmë asnjë shkelje të MSAsë, Komisioni Evropian mirëpret vullnetin e autoriteteve Shqiptare për ta amenduar Ligjin Special, me qëllim hapjen e garës për projektin e Teatrit Kombëtar, në mënyrë që çdo kompani private të mund të aplikojë një propozim për projektin,” theksohet në letrën e Komisionit Evropian.
Pra Ligji është korruptiv ndërkohë amendimet e paralajmëruara nga kryetari i bashkisë së Tiranës, Erion Veliaj pritet të zgjidhin përfundimisht klientin bashkiak i cili do ti kënaq orekset e Edi Ramës për prishjen e Teatrit Kombëtar.
Komisioni Evropian nuk pranon të shprehet për shkeljet kushtetuese si mbivendosja e Qeverisë nda pushtetit vendor ose grabitja e pronës private, por me Reformën në Drejtësi është e qartë se për këtë çështje është kujdesur vetë kryeministri Edi Rama.
Sot, mungesa e Gjykatës Kushtetuese, për fat të keq, rritë mundësinë e realizimit të qëllimeve të Edi Ramës, nëse vërtetë ka vendosur me çdo kusht ta shembë Teatrin Kombëtar, tashmë edhe pa “Fushën” e Erionit; Ose ky i fundit e ka zgjidhur ndër ndërtuesit klientë të Bashkisë së Tiranës, se kush është ai që do të kaloj edhe këtë pengesë deri tek ndërtimi i “Kullave me Teatër”!
Në gjithë këtë katraurë me Ligje dhe amendime, protesta dhe BE, tashmë është e qartë se shpëtimi i vetëm për Teatrin Kombëtar nuk është më Aleanca për mbrojtjen e Teatrit, por Populli për shpëtimin e Teatrit.
Ndryshe, Erion Veliaj do ta lë për pak çaste lopatën për mbjelljen e pemëve, dhe do të merret me fadromën e kompanisë “Fusha” për të zbatuar urdhrat e shefit artist, Kryeministrit Edi Rama, i cili e do të zhdukur nga faqja e dheut, Teatrin Kombëtar.
