Ligjvënësit britanikë votojnë edhe për një shtyrje të Brexit

Ligjvënësit britanikë votuan për të detyruar kryeministren Theresa May që të kërkojë nga Bashkimi Evropian zgjatjen e procesit të daljes së Britanisë nga BE që njihet si Brexit, në mënyrë që të shmanget dalja pa marrëveshje, më 12 prill.

Legjislacioni tani duhet të miratohet nga Dhoma e Lartë e Parlamentit dhe BE-ja pastaj do të vendosë për shtyrjen e procesit ose jo.

Dhoma e Lartë do të debatojë dhe votojë sot.

Data e Brexit-it tashmë është shtyrë një herë, pasi fillimisht ka qenë e paraparë për 29 mars.

Skena politike në Britani është thellësisht e ndarë rreth këtij procesi.

Ligjvënësit kanë refuzuar tri herë marrëveshjen që ka arritur kryeminisrja May me BE-në, për kushtet e divorcit. Kundërshtimet kanë pasur të bëjnë kryesisht me çështjen e kufirit të Irlandës, pas Brexit-it.

Bashkimi Evropian paralajmëroi këtë javë se Brexiti pa marrëveshje po bëhet gjithnjë e më i mundshëm, ndërsa ekspertët kanë tërhequr vërejtjen se një gjë e tillë do të shkaktonte recesion në Britani dhe do të ngadalësonte rritjen ekonomike në bllokun evropian.

Britania ka vendosur të largohet nga Bashkimi Evropian me një referendum të mbajtur në vitin 2016.