“Lirimi i pasurive të Malltezit”, Apeli i GJKKO rrëzon SPAK për përjashtimin e gjyqtares

Gjykata e Posaçme e Apelit për Korrupsionin dhe Krimin e Organizuar, ka rrëzuar kërkesën e Prokurorisë së Posaçme kundër Korrupsionit dhe Krimit të Organizuar për përjashtimin e gjyqtares, Ilirjana Olldashi nga gjykimi i çështjeve të Jamarbër Malltezit.

Ndërsa sot Gjykata shqyrton kërkesën e Malltezit për heqjen e sekuestros për 25 pasuri të tij.

“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Miliana Muça, sot më 24.11.2023, shpalli vendimin mbi çështjen penale nr. 11 akti, datë 23.11.2023 regjistrimi, regjistruar mbi kërkesën me objekt “përjashtimin e gjyqtares Iliriana Olldashi nga shqyrtimi i çështjes gjyqësore penale me objekt ankim kundër vendimit penal nr. 410 akti, datë 20.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar për vendosjen e masës së sigurimit pasuror (sekuestro preventive), me ankues personi nën hetim J.M dhe shtetasen A.M”, dhe vendosi:

Të shpallë të papranueshme kërkesën e Prokurorisë së Posaçme kundër Korrupsionit dhe Krimit të Organizuar me objekt: “përjashtimin e gjyqtares Iliriana Olldashi nga shqyrtimi i çështjes gjyqësore penale me objekt ankim kundër vendimit penal nr. 410 akti, datë 20.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar për vendosjen e masës së sigurimit pasuror (sekuestro preventive), me ankues personi nën hetim J.M dhe shtetasen A.M,” thuhet në njoftimin e Gjykatës Posaçme të Apelit për Korrupsionin dhe Krimin e Organizuar.

Ndryshe, gjyqtarja Ilirjana Olldashi të cilën SPAK kërkoi ta përjashtoi nga nga gjykimi i çështjeve të Jamarbër Malltezit, vendosi të lirojë nga qelia Malltezin, duke ndryshuar masën e sigurisë nga arresti me burg, në arrest shtëpiak.