“Liroi” Dritan Dajtin/ Kontroll në shtëpi, gjyqtari me municion dhe armë pa leje, euro…

Pas kontrollit të bërë në 5 banesat e tre gjyqtarëve që votuan për gjykim të shkurtuar për Dritan Dajtin duke e bërë nul vendimi për të përjetshëm, gjyqtari Skender Damini është shoqëruar në polici.

Mësohet se gjatë kontrollit në banesën e tij janë gjetur fishekë dhe arma pa leje  si dhe mijëra euro të futura në një sirtar së bashku me të brendshme grash.

Gjyqtari Damini është marrë në pyetje në Drejtorinë e Policisë së Tiranës. Ai ka dhënë vetëm një deklaratë në prani të avokatit për sendet e sekuestruara gjatë kontrollit në banese dhe pasi ka firmosur është lënë i lirë.

I pyetur nga mediat, vetë gjyqtari Skender Damini nuk ka pranuar të japë asnjë koment për gazetarët. Mësohet se për momentin për gjyqtarët nuk ka ende urdhër ndalimi apo arrestimi por është hapur një procedim penal nga prokuroria e Krimeve të Rënda për shpërdorim detyre dhe korrupsion.

Ndërkohë në momentin kur forcat policore shkuan në banesën e gjyqtarit të Apelit të Vlorës, Petrit Aliaj, ai nuk është gjetur aty dhe ka dyshime se mund të jetë larguar nga Shqipëria.

Policia e Shtetit ka konfirmuar aksionin e ndërmarrë nga forcat speciale, në zbatim të urdhrit nr. 89, datë 14 shkurt 2019, të Gjykatës së Shkallës së Parë për Krime të Rënda, për të ushtruar kontroll në banesat e tre gjyqtarëve, të cilët zbutën dënimin e Dritan Dajtit.

Operacioni policor vazhdon edhe në këto momente, por mund të konfirmojmë se deri tani janë gjetur një sasi municioni, mijëra euro dhe prova të tjera, të cilat do të administrohen nga organet ligjzbatuese, thekson në njoftimin e saj Policia e Shtetit.

Ndryshe, policia ka kryer kontrollet në banesat e gjyqtarit të Gjykatës së Apelit në Vlorë, Skënder Damini, i cili ka dy banesa në Vlorë dhe Tiranë, gjyqtarit në Gjykatën e Apelit Vlorë, Petrit Alia, i cili ka banesa në Tiranë dhe Sarandë, dhe gjyqtarit në Gjykatën e Apelit në Shkodër, Aleks Nikolla, i cili ka banesë në Lezhë. 

Njoftimi i Policisë

Duke iu përgjigjur interesimit shumë të madh të medias, Policia e Shtetit konfirmon aksionin e ndërmarrë nga forcat speciale, në zbatim të urdhrit nr. 89, datë 14 shkurt 2019, të Gjykatës së Shkallës së Parë për Krime të Rënda, për të ushtruar kontroll në banesat e tre gjyqtarëve, të cilët zbutën dënimin e Dritan Dajtit.

Operacioni policor vazhdon edhe në këto momente, por mund të konfirmojmë se deri tani janë gjetur një sasi municioni, mijëra euro dhe prova të tjera, të cilat do të administrohen nga organet ligjzbatuese. Në përfundim të operacionit, Policia e Shtetit do të ketë një komunikim të veçantë me median dhe publikun.