Lista Srpska, me interesa të Serbisë në Kosovë!

Pas vendimit të kuvendeve komunale të Mitrovicës Veriut, Zveçanit, Leposaviçit dhe Zubin Potok për dalje nga Asociacioni i Komunave të Kosovës, ka reaguar Ministri në detyrë i Administrimit të Pushtetit Lokal, Elbert Krasniqi, duke theksuar se çdo vendimmarrje, çdo hyrje dhe dalje në secilin organ të Republikës së Kosovës ka rregulla dhe procedura të qarta, në përputhje me Kushtetutën dhe ligjet në fuqi në Republikën e Kosovës, dhe bazuar në raportet e monitorimit të këtyre mbledhjeve, është konstatuar se kryetarët e komunave kanë propozuar në mënyrë të kundërligjshme pika shtesë për rendin e ditës.

“Si rrjedhojë, pikat e propozuara në këtë mënyrë nuk kanë kaluar procedurë të ligjshme dhe konsiderohen të kundërligjshme, duke vënë në pikëpyetje ligjshmërinë e vendimeve të marra mbi to,” thekson Elbert Krasniqi duke konstatuar:

“Për fat të keq, Lista Serbe, përmes kësaj iniciative, edhe një herë po dëshmon se ka për objektiv përçimin e interesave të Serbisë në Kosovë për nxitje të përçarjeve, mosbesimit dhe tensioneve, e jo përfaqësimin e interesave të serbëve të Kosovës, integrimin dhe mirëqenien e tyre në shoqëri.”