Lista Srpska: Sava Janjiç nuk është më prift!

Lista Srpska ka vlerësuar se prifti, Sava Janjiç, igumen i manastirit të Deçanit me deklaratat kundër vendit të tij dhe përpjekjet për të zgjidhur problemet në Kosovë me kompromis dhe dialog, pushoi së qenuri një prift dhe u bë pjesëmarrës në jetën politike.

Tani, siç thotë Lista Srpska, Dragutin (Sava) Janjiç, është i zemëruar dhe i pakënaqur, sepse dikush guxon të kritikojë dhe të mohojë pikëpamjet e tij politike.

Në fakt, sipas kësaj logjike, ai kurrë nuk ka qenë prift, sepse me politikë është marrë edhe kur keqtrajtoheshin, përdhunoheshin dhe vriteshin shqiptarët, vetëm se atëherë ishte në anën e pushtetit, pra, kriminelit Sllobodan Millosheviç.

Edhe kur ky iku nga pushteti, Ati Sava merrej me politikë duke kundërshtuar kërkimin e varrezave masive me trupa të pajetë të shqiptarëve në oborret e Kishave Ortodokse Serbe. Por atëherë për anëtarët aktual të Listës Srpska, ishte prift.

Sot kur ai i nënshtrohet vetëm hierarkisë kishtare dhe jo asaj të Vuçiçit, meqë Millosheviçi nuk është gjallë, atëherë Lista Srpska e zhvesh nga prifti por duart nuk ja pastron dot. I ka me gjak, si prift dhe si politikanë!