Live/ Lamtumirë Papa Françesku

Sot u hapën portat në orën 05:30 për të paktën 200 mijë besimtarë që marrin pjesë në ceremoninë e varrimit të Papa Françeskut, e cila fillon në orën 10:00 në Sheshin Shën Pjetër.

Qeveria e Shqipërisë, me një vendim të datës 24 Prill ka shpallur ditë zie kombëtare 26 prillin në nder të Papa Françeskut.

Trupi i tij do të përcillet nëpër rrugët e Romës drejt Kishës së “Santa Maria Maggiore”, ku edhe do të prehet. Gjatë rrugëtimit rreth 5 kilometra, pjesëmarrës të shumtë do të kenë mundësinë t’i japin Papa Françeskut lamtumirën e fundit.

Meshën funerale do ta kryesojë kardinali Giovanni Battista Re, dekan i Kolegjit të Kardinalëve. Ajo do të kremtohet nga patriarkë, kardinalë, peshkopë dhe priftërinj nga mbarë bota.

Zyra e Protokollit të Sekretariatit të Shtetit të Vatikanit raporton se janë konfirmuar 130 delegacione për funeralin e Papa Françeskut të shtunën në mëngjes, nga të cilët afërsisht 50 krerë shtetesh dhe 10 sovranë mbretërorë.

Shqipëria do të përfaqësohet nga Presidenti i Republikës, Bajram Begaj ndërsa Kosova nga Presidenja Vjosa Osmani. Nga liderët botërorë kanë konfirmuar pjesëmarrjen e tyre Presidenti i SHBA-ve, Donald Trump së bashku me zonjën e parë Melania Trump. Princi Uilliam i Britanisë do të marrë pjesë në funeralin në emër të Mbretit Charles, i shoqëruar nga Kryeministri i Mbretërisë së Bashkuar, Keir Starmer.

Rreth 2.000 policë janë në detyrë, ndërsa mijëra oficerë të tjerë janë angazhuar në përforcimin e sigurisë kombëtare. Në Romë është aktivizuar edhe sistemi antirdron dhe antiraketë.

Masat e sigurisë janë në nivelin më të lartë për shkak të pjesëmarrjes së liderëve botërorë. Të gjitha rrugët përreth Vatikanit janë mbyllur sot. Sakaq, Bazilika e Shën Pjetrit qëndroi e hapur deri në orën 02:30 të mëngjesit të së enjtes dhe u rihap në orën 05:40 të mëngjesit të së premtes.

Nga ora 11:00 e së mërkurës, më 23 prill, deri në orën 12:00 të së premtes, mbi 150.000 njerëz u mblodhën për të përshëndetur Papa Françeskun. Fluksi i besimtarëve drejt Bazilikës ka qenë i pandërprerë. Trupi i pajetë i Papës u vizitua deri në orën 18:00, kur Bazilika u mbyll për publikun. Ata që ndodheshin ende brenda, patën mundësinë të përfundonin homazhet.

Sipas zëdhënësit të Vatikanit, Matteo Bruni, Bazilika nuk mund të qëndronte më e hapur për arsye sigurie. Ai tha se ajo do të shërbejë si pikë kalimi për delegacionet e huaja që marrin pjesë në funeral dhe se në mbrëmje do të zhvillohet edhe rituali i mbylljes së arkivolit.