Live/ Presidenti i 47-të i SHBA, Donald Trump
Epoka e artë e Amerikës fillon sot, tha Presidenti i 47-të i SHBA, Donald Trump, pasi u betua duke u zotuar se kthehet në presidencë i sigurt dhe optimist në fillimin të një epoke të re emocionuese të suksesit kombëtar!
“Epoka e artë e Amerikës fillon që tani. Që nga ky moment, rënia e Amerikës ka përfunduar. Ne do ta çojmë atë drejt majave të reja të fitores dhe suksesit. Nuk ka asnjë ëndërr që nuk mund ta realizojmë. Ne nuk do të thyhemi. Ne nuk do të dështojmë,” tha Presidenti i ri i SHBA, Donald Trump, duke u zotuar se do të urdhërojë shpejt ndryshime gjithëpërfshirëse të politikave të Joe Biden që shkatërruan vendin.
“Kthehem në presidencë i sigurt dhe optimist se jemi në fillimin e një epoke të re emocionuese të suksesit kombëtar. Një valë ndryshimi po përfshin vendin,” tha Presidenti Trump para 600 të ftuarve në Kongres dhe miliona njerëzve në Amerikë dhe botë, që dëgjuan dhe mesazhin kryesor që kishte për amerikanët që pritet të reflektoj kudo:
“Mesazhi im për amerikanët sot është se është koha që ne të veprojmë edhe një herë me guxim, energji dhe vitalitet të qytetërimit më të madh në histori!”
Dhe, ishte i qartë edhe me të tjerët:
“Rrezet e diellit po shtrihen në të gjithë botën dhe Amerika e ka rastin ta shfrytëzojë këtë mundësi si kurrë më parë!”
Ndryshe, ceremonia e inaugurimit të Presidentit të ri filloi rreth orës 11:30 sipas kohës lokale ndërsa Komisioni i Inaugurimit tha se është zgjedhur në më mënyrë simbolike ora 11:47 meqë Trump është presidenti i 47-të amerikan.
Zv/Presidenti i sapozgjedhur J.D. Vance u betua përpara gjyqtarit të Gjykatës së Lartë, Brett Kavanaugh, i emëruar gjatë mandatit të parë të Donald Trump.
Ndërsa Presidenti i zgjedhur Donald Trump u betua përpara Kryetarit të Gjykatës së Lartë, John Roberts.
Me betimin solemn, Presidenti Donald Trump filloi mandatin e tij të dytë dhe i dyti pas Ish-Presidentit Grover Cleveland në vitet 1890 që shërbeu për një mandat të dytë jo të njëpasnjëshëm.
Me inaugurimin e Presidentit Trump, Presidenti demokrat Joe Biden largohet nga posti pas një mandati të vetëm katërvjeçar në Shtëpinë e Bardhë, pasi e mori botën nga Trump në vitin 2021 në paqe dhe po e lë me dy konflikte të armatosura, të rrezikshme për njerëzimin.
