Live/ Protesta e Opozitës, Basha: Koha për lojërat e Edi Ramës ka marrë fund!
Shtimi i radhëve të opozitës në Protestën e 7-të Kombëtare ishte përgjigja më e mirë për Kryeministrin Edi Rama i cili vazhdon e përsërit se populli i do zgjedhjet.
Qindëra mijëra shqiptarë në Protestën e Opozitës para Kryeministrisë i dhanë pwrgjigje tw qartë qeverisjes kriminale të Edi Ramës, madje edhe kur protestuesit ranë pre e provokimeve të policisë së Ish-Gjeneral Sandër Lleshajt, Kryetari i Partisë Demokratike ndërprente fjalën e tij duke i bërë thirrje protestuesëve që të mos prekin efektivët e policisë. Në fjalën e tij, Kryetari i PD, Lulzim Basha, shprehet qartë se nuk mund të pranojnë kurrë monizmin, procesin kriminal që po u ofrohet shqiptarëve në vend të zgjedhjeve të lira e të ndershme. Koha për lojrat e Edi Ramës po merr fund, tha ai duke garantuar se rrugën tonë të Evropës do ta hapim:
“Qytetarë nga e Tirana dhe e gjithë Shqipëria që keni vërshuar në këtë bashkim të paparë asnjëherë, të fuqisë popullore, që jeni mbledhur dhe kemni derdhur në këtë shesh këtë energji, këtë vendosmëri, këtë shpresë të pandalshme, mirë se keni ardhur,” tha Lulzim Basha duke shpreh mirënjohjen, nderin dhe privilegjin, në emër të çdo vogëlushi shqiptar, në emër të të gjithë shqiptarëve kudo ku janë, për këtë asamble të paparë dhe të padëgjuar të lirisë e të demokracisë:
“Të mbledhur, të vendosur, kaq të prerë e të qartë në kushtrimin tuaj që sonte ushton për ta dëgjuar e gjithë bota: Rama ik!”
Bashkë me rininë janë edhe profesorët, akademikët, elita e këtij vendi, tha lideri i opozites, të cilët janë trajtuar prej Edi Ramës si armiq të vërtetë, vetëm e vetëm se janë armiq të injorancës, janë armiq të autokracisë orientale, sepse janë të dashuruar me dijen, sepse duan që dija ta çojë rininë dhe këtë komb përpara drejt Evropës, sepse nuk e mbyllin gojën, sepse nuk e ulin kokën, ndaj persekutohen, dhunohen, shantazhohen, pushohen nga puna.
Ndaj në këtë vend, si në asnjë vend të Evropës, as të Azisë, as të Afrikës, 30 vite pas shembjes së komunizmit, Edi Rama asgjëson akademinë e shkencave dhe kthen karikaturën e diktaturës në krye të Akademisë së Shkencave, njësoj si në krye të Kuvendit, sepse ai vetë është një karikaturë e diktaturës, që s’ka asgjë të përbashkët me intelektin, asgjë të përbashkët me shkencën, me artin me dijen.
Ndaj sot, ushton nga ky shesh në emër të çdo pedagogu dhe elitës së kombit, ushton thirrja “Rama ik”.
Basha: Koha për lojrat e Edi Ramës ka marrë fund
Nuk mund të pranojmë dhe nuk do të pranojmë kurrë errësirën e tiranisë së krimit, tha Basha duke vazhduar:
“Nuk mund të pranojmë kurrë monizmin, procesin kriminal që po u ofrohet shqiptarëve në vend të zgjedhjeve të lira e të ndershme.
E gjithë beteja jonë bëhet për zgjedhje të lira e të ndershme, e gjithë beteja jonë bëhet për vlera evropiane.
Nuk mund të pranojmë Edi Ramën dhe bandën e tij ta mbajnë përherë të mbyllur derën e Evropës, sepse ajo është shpresa jonë, ato janë vlerat tona.
Rrugën tonë të Evropës do ta hapim. Rama ik!
Dua ta them fare qartë sot, se koha për lojrat e Edi Ramës po merr fund.
Kufoma politike që i dridhej dora teksa lexonte plagjiaturën e Albin Kurtit në Lezhë, tregon qartë se pushteti i krimit ka vdekur moralisht, por ai duhet kallur dhe politikisht,” tha Kryetari i Partisë Demokratike, Lulzim Basha, duke i bërë thirrje protestuesëve vazhdimin e protestës me marshimin drejtë Parlamentit të Shqipërisë.
