Live/ SHBA, republikanët pranë fitores për Kongres, gara për Senat në fije të perit
Numërimi i votave për zgjedhjen e 435 anëtarëve të Dhomës së Përfaqësuesve, 35 nga 100 anëtarët e Senatit, dhe 36 nga 50 guvernatorë sa janë në Amerikë, si dhe zyrtarët tjerë në nivel të shteteve federale, vazhdon dhe aktualisht befasi që ndryshojnë dukshëm projeksionet e sondazheve nuk ka, dhe në garën për Kongres epërsia e republikanëve vazhdon ndërsa ajo për Senat është në fije të perit.
Numërimi i votave për garën për Dhomën e Përfaqësuesve vazhdon, dhe aktualisht, ashtu siç kishin parashikuar sondazhet, republikanët janë në epërsi.
Ndërkohë për Senat aktualisht rezultati është i barabartë përkundër epërsisë momentale që kishin demokratët gjatë numërimit të votave.
Në 36 shtete federale vazhdon dhe numëri i votave për guvernator ndonëse këto gara janë më pak në fokus, mund të kenë pasoja afatgjate në vendimet lidhur me çështjet e abortit, armëve dhe mohimit të rezultateve të disa zgjedhjeve të ardhshme.
Ndërkohë republikanët pretendojnë të fitojnë në shtetet që janë të rëndësishme për zgjedhjet e ardhshme preidenciale në vitin 2024.
Rezultatet në kohë reale mund ti ndiqni KETU.
Nëse republikanë marrin Kongresin?
Gara kryesore në këto zgjedhje është kontrolli ndaj Kongresit, të cilin aktualisht e kanë demokratët, dhe pritet ta marrin republikanët. Për shkak të shumicës së brishtë, republikanëve u duhen vetëm gjashtë mandate më shumë se sa që kanë aktualisht për të marrë kontrollin mbi Kongresin.
Kjo do të thotë se agjenda e presidentit demokrat, Joe Biden, do të bllokohet, përkatësisht nuk do të ketë mbështetjen për miratimin e ligjeve, siç e gëzonte deri më sot. Ndërkohë Biden e ka të drejtën e vetos në vendimet e Kongresit.
Gara për Senat, ku të dy partitë kanë nga 50 ulëse, demokratët e kanë një votë më shumë, të Zv/Presidentes Kamala Harris, do të varet nga rezultati i zgjedhjeve në disa shtete ndër të cilat Pennsylvania, Georgia, Arizona dhe Nevada.
Senati, ndër të tjera konfirmon nominimin presidencial për zyrtarët e lartë, gjyqtarët, ambasadorët dhe mund ti bllokon nëse dëshiron.
