“Lobimi rus”/ Gjykata pushon çështjen, Eduard Halimi: Ishte sajesë!
Pasi Gjykata e Tiranës pushoi çështjen që nga Partia Socialiste u propagandua si “Lobim rus i Partisë Demokratike” dhe përfundoi si “falsifikim formularësh”, Ish-Ministri i Drejtësisë dhe avokati i kësaj partie i cili përfaqësoi Lulzim Bashën në seancën e gjyqit paraprak që u zhvillua sot, tha se pas më shumë se 2 vite hetime nga prokuroria u provua se gjithćka ishte një akuzë tërësisht e sajuar.
“Vendimi i sotëm i gjykatës ishte një vendim drejtësie. U provua pas më shumë se 2 vite hetime nga ana e prokurorisë, se gjithçka ishte një akuzë tërësisht e sajuar, bazuar vetëm mbi spekulime, dhe u vërtetua katërciprisht se nga 2 vjet hetime nuk kishte asnjë lidhje Partia Demokratike dhe nuk kishte asnjë vepër penale.”
Nuk ishte shkelur asnjë ligj nga Partia Demokratike dhe as nga zyrtarët e saj, tha Eduard Halimi, as në Shqipëri dhe as në vend tjetër.
“U vërtetua katërciprisht se vepra penale nuk ekzistonte, fakti nuk ekziston, dhe vendimi i sotëm është një vendim për tu përshendetur. Pra, ishte një vendim drejtësie. Ky ishte një vendim që rrëzoi tërësisht gjithë akuzën, gjithë gjuetinë e shtrigave që për dy vjet u mbajt në territorin e prokurorisë dhe që u rrëzuan përfundimisht të gjitha akuzat ndaj Partisë Demokratike.”
Gjykata e Tiranës vendosi sot pushimin e çështjes për kryetarin e PD, Lulzim Basha, ish-sekretarin e përgjithshëm, Arben Ristani dhe financierin e partisë Ilir Dervishi, pas akuzave për falsifikim formularësh, lidhur me kontratat e lobimit në SHBA në shumën e 675 mijë dollarë
Ndryshe. Prokuroria kishte dalë qesharake edhe pa këtë vendim të Gjykatës së Tiranës.
Në fillimnëntorin e vitit 2019, pasi Prokuroria e Tiranës mbylli hetimet për çështjen e financimeve në SHBA për zgjedhjet parlamentare të vitit 2017 duke pushuar akuzën e lobimit rus e pastrimit të parave për Kryetarin e Partisë Demokratike, Lulzim Basha dhe duke e dërguar dosjen në gjykatë vetëm për akuzën e falsifikimit të formularit të financave të partisë, dukshën i paknaqur dhe në mungesë të reagimit të Kryeministrit Edi Rama dhe Zëvendësit të tij Erion Braçe, reagon Kryetari i Grupit Parlamentar të PS, Taulant Balla, duke i dhënë “urdhër” Gjykatës që mos ta pranojë dosjen dhe ta rikthejë për hetim.
“Teksa shqiptarët presin të ngrihet SPAK është papranueshme që prokurorë të caktuar të bëjnë amnisti për vepra penale kaq të rënda. Gjykata nuk duhet ta pranojë dhe duhet ta rikthejë për hetim,” thekson në “urdhërin” e tij Taulant Balla duke reaguar përmes rrjeteve sociale dhe duke i dhënë vetes kompetencë të përcaktoj edhe fatin e kësaj dosje:
“Kjo dosje duhet të hetohet nga SPAK jo nga KÇK!”
Pas “urdhërit” të Taulant Ballës, Drejtuesja e Prokurorisë së Tiranës Elisabeta Imeraj tha se pasi ishte njohur me dokumentet që kanë të bëjnë me dosjen hetimore kishte konstatuar parregullsi.
“Dosja nuk është dërguar ende në gjykatë, madje nuk është qepur ende,” tha Imeraj, gjithsesi asnjë “qepje” nuk ndryshoi asgjë.
