Loja e Serbisë, Nishani: Pengimi i Kosovës, minim i stabilitetit të rajonit!
Ish-Presidenti i Republikës, Bujar Nishani ka kritikuar Serbinë se nuk ka respektuar marrëveshjen për mos pengimin e Kosovës, por përkundrazi ka investuar lobime të fuqishme për të destabilizuar procesin e integrimit të Kosovës në botën ndërkombëtare.
Presidenti Nishani në një intervistë për KosovaPress, tha senuk ka asnjë dilemë në rajon dhe as nga Shtetet e Bashkuara dhe Bashkimi Evropian, që Kosova ka qenë gjithmonë një mbështetëse dhe e gatshme për dialogun me Serbinë, por është Serbia ajo që pengon proceset.
Institucionet e Kosovës, tha ai, janë të interesuara për vijimin e dialogut por kanë të drejtën e tyre që të shikojnë implementimin e marrëveshjeve të arritura deri tash me Serbinë.
Me këtë rast, Presidenti Nishani shprehu bindjen e thellë që Kosova së shpejti do i bashkohet NATO-s dhe askush në proceset e integrimit evropian nuk mund ta pengojë Kosovën, pasi sipas tij, pengimi i Kosovës do thotë minim i stabilitetit të rajonit.
Sa i përket dialogut me Serbinë, ai vlerëson se ka ardhur koha që dialogu dhe procesi i stabilizimit shqiptaro-serb të jetë në një rrugëkalim të qartë me etapa, me objektiva të qarta.
Duke folur për gjendjen në Shqipëri, Presidenti Nishani tha se çdo neglizhencë e krizës së madhe, do të mund ta sjellë një situatë të përleshjes së qytetarëve me përfaqësuesit e institucioneve.
“Integrimi i Shqipërisë në Bashkimi Evropian është bllokuar. Fajtori kryesor për këtë është politika aktuale e Shqipërisë e udhëhequr nga Edi Rama. Kjo klasë politike është duke e rrezikuar edhe lëvizjen e lirë të popullit shqiptar,” tha Ish Presidenti Bujar Nishani duke konstatuar se Shqipëria sot ka institucionet më të dobëta që kishte ndonjëherë, pasi krimi i organizuar dhe korrupsioni tashmë janë bërë pjesë e politikës .
