“Loja me Beqjen e shkurdisur”, Pas rrëmujës flet shpëtimtari Rama: Nuk ka ulje pensionesh dhe pagash!
Sot Kryeministri Edi Rama mori përsipër të sqaroj deklaratën e Ish- Ministrit të Shëndetësisë, Ilir Beqja, për ulje pagash dhe pensionesh, duke thënë se nuk e ka artikuluar ekzaktësisht ashtu, por bënë sikur harron se kujt po i bënë avokati. Njeriun të cilin e mbronë Kryeministri, para se të merrte përsipër shkatërrimin e sistemit shëndetësor ka drejtuar Institutin e Sigurimeve Shoqërore dhe nuk ka nevojë për avokati meqë e ka parasysh gjithë skemën si të rrogave ashtu dhe pensioneve, ashtu si dhe buxhetin e domosdoshëm.
Por kur Edi Rama nuk vesh çitjane ose kostum me atlete, i duhet një i marrë që opozita të merret me te, dhe si në rastet e kaluara, ai deputetin rilindas nuk e kurdisi por e nxori të shkurdisur në pazar dhe sërish korri sukses.
Pasi u çua një pluhur i madh rreth kësaj deklarate pa lidhje të Beqjes, sot Edi Rama shprehet:
”Së pari nuk e ka thënë ekzaktësisht ashtu. Së dyti secili mund të ketë ide. Por nga kjo tek akuza skandaloze e bërë nga opozita se qenka një eksperiment i rrezikshëm kriminal, tek e vërteta është një distancë shumë e largët. Pra jo, jo,jo, jo, jo.” tha Kryeministri Rama duke bërë tani shpëtimtarin se një gjë e tillë nuk do të ndodhë kurrë dhe as nuk është në planet e tij kjo gjë.
“Nuk ka ulje pensionesh. Të gjithë mund të thonë ide të caktuara, por sa i përket qëndrimit zyrtar të qeverisë dhe timit, kurrë nuk ka pasur dhe nuk do të ketë prekje të pensioneve dhe pagave. Nuk do të preken për asnjë arsye në botë. Është vërtet një situatë e vështirë, ku duhet të përballesh me transferimin e një fjale të thënë diku, që kthehet pastaj në akuzë kundër meje, por nuk ka asnjë rrugë tjetër, përveçse të mos i marrim seriozisht dhe të qeshim pak me ta.
Me këtë rast Kryeministri Edi Rama paralajmëroi zgjerimin e Zonës së Gjelbërt më 11 Maj:
“Më 11 maj do të kemi një rivizitim të situatës së përgjithshme, ku do të shohijm dhe efektet e hapjes në zonat e gjelbërta, që do të zgjerohen në javën e ardhshme, dhe vetëm mbi këtë bazë do të marrim vendime të tjera.”
Pas suksesit me deklaratën e Beqjes dhe avokatinë e Kryeministrit Rama, vetëm një e vërtetë është në këtë mes dhe kjo doli nga goja e Ish-Drejtorit të Përgjithshëm të Sigurimeve Shoqërore në këtë kohë COVID-19:
“Nga 1 maj 2020 deri në 31 dhjetor 2020, të gjithë të punësuarit e sektorit publik, institucione e ndërmarrje, qendrore e vendore, të varura e të pavarura, të paguhen me 90 % të pagës së tyre normale. Por jo më pak se paga minimale në shkallë vendi, duke përjashtuar edhe ata që janë në vijën e frontit të luftës. Paga mesatare mujore në sektorin publik është 63,000 lekë. Të punësuar janë rreth 172 mijë. Krijojmë kështu një fond rreth 8,7 mld lekë (4,5 mld punonjës buxhetorë dhe 4,2 mld punonjës jobuxhetorë). Po kështu, çdo pension suplementar e shtesë pensioni suplementar (nëpunës i lartë shtetëror, ushtarak në lirim, profesor etj.) për tetë muajt e mbetur të vitit, të marrë 75 % të këstit mujor të muajit prill 2020.”
