Lojë më e mirë e Dardanëve, fitore e Spanjës me 2:0

Dardanët bën një paraqitje mjaft të mirë përballë një skuadre të madhe siç është Spanja por kjo nuk mjaftoi për fitore. Përfaqësuesja e Kosovës është mundur nga Spanja, me rezultat 0:2, në “Fadil Vokrri”, sfidë kjo e zhvilluar në kuadër të kualifikueseve për Kupën e Botës “Katar 2022”,

Dardanët në pjesë e parë të lojës krijuan dy raste mjaft të mira përmes Rashicës dhe Rashanit, megjithatë, skuadrat shkuan në pushim me epërsinë minimale të Spanjës prej 0-1, me golin e Fornals (32’).

Në pjesën e dytë, Dardanët shfaqën lojë edhe më të mirë, derisa rrezikuan përmes Loshaj, Rashicës, Muriqit dhe Rashanit, por assesi topi nuk preki rrjetën spanjolle.

Ndërkohë, në fund të kësaj sfidë interesante, Ferand Torres (88’), dyfishoi epërsinë e Spanjës në 2-0, rezultat më të cilin edhe u mbyll kjo ndeshje.

Menjëherë pas ndeshjes, raporton RTK, Federata e Spanjës ka reaguar duke e cilësuar si një fitore të palodhshme atë ndaj Kosovës.

“Çfarë fitoreje e madhe dhe e palodhshme për kombëtaren spanjolle në një fazë shumë të ndërlikuar!! Punë e shkëlqyer nga Luis Enrique dhe lojtarë,” thuhet në reagimin e spanjollëve. 

Pas kësaj ndeshje, Spanja kryeson tabelën në Grupin B me 13 pikë të tubuara, kurse, Kosova renditet e katërta me katër pikë.

Grupi i tifozëve “Dardanët” të pranishëm në stadium kanë shpalosur një flamur gjigant në tribuna dhe kanë zbuluar mesazhin “Mirë se erdhët në Republikën e Kosovës”.

Ndryshe, para ndeshjes në konferencë për shtyp lojtarët e Spanjës nuk pranuan ta përmendin emrin “Kosovë”, ndërsa mediat spanjolle vazhdojnë të mos raportojnë për Kosovën pasi Spanja nuk e njeh Kosovën si shtet.