Lojërat e Fatit/ Presidenti dekreton ndryshimet në Ligji. Nga 1 Janari…

Presidenti i Republikës, Ilir Meta ka dekretuar ndryshimet në ligjin për Lojërat e fatit.

Duke filluar nga 1 janari 2019, Ligji parashikon mbylljen e lojërave të fatit si bastet sportive, bingot, bastet me gara në pistë dhe lojërat e fatit online.

Afati i aktivitetit të tyre është deri më 31 dhjetor 2018. Pas këtij afati, ashtu siç parashikon dhe ligji do të lejohet vetëm veprimtaria e kazinove në hotele me 5 yje të certifikuara si të tilla.

Me ndryshimet e Ligjit për lojërat e fatit do të mbyllen rreth 4.200 pika dhe do të mbeten 7.900 të papunë. Me rastin e prezantimi të këtyre ndryshimeve, ministri i Ekonomisë e Financave Arben Ahmetaj është shprehur se, për të papunët do të ofrohen kurse trajnimi dhe kualifikimi. Ndërsa 700 milionë euro që llogaritet mungesa e të ardhurave në buxhet nga mbyllja e lojërave të fatit, Ahmetaj tha se, do t’i kërkojë Parlamentit rritjen e taksave për ato kazino që do të mbeten.