Lojërat e Vuçiçit me qeverinë dhe synimet e qeverisë së re

Ende katër muaj pas zgjedhjeve, Serbia nuk ka emëruar ministrat e kabinetit të ri qeveritar. Pas një takimi tjetër të kryesisë së partisë së tij SNS, presidenti Vuçiç bëri të ditur synimet e qeverisë së re.

Do të kishte qenë logjike, e mbase edhe ligjore, që synimet e qeverisë së re t’i paraqesë mandatarja për formimin e saj, Ana Brnabiq, e jo presidenti Aleksandar Vuçiç. Por pikërisht kjo ndodhi pas takimit të kryesisë së Partisë Përparimtare Serbe (SNS).

Në vend të përbërjes së kabinetit të ri qeveritar, presidenti Vuçiq bëri të ditur se kryetari i ri i Parlamentit të Serbisë do të jetë ministri i deritanishëm i Jashtëm Ivica Daçiç, kryetar i Partisë Socialiste të Serbisë. Një pjesë të pushtetit do ta marrë edhe Aleanca Patriotike Serbe (SPAS) e ish-vaterpollistit Aleksandar Shapiç, i cili do të ketë edhe një post ministror.

Në qeverinë e re të Serbisë do të futen edhe minoritetet, por edhe më i rëndësishëm është fakti që kjo do të jetë një qeveri me mandat të kufizuar, sepse Vuçiqi bëri të ditur se zgjedhjet e reja në Serbi do të mbahen më së largu deri me 3 prill të vitit 2022.

Lufta kundër mafias – prapë

Presidenti i Serbisë bëri të ditur edhe synimet e qeverisë së re serbe: “Lufta kundër COVID-19, lufta për interesat e popullit tonë në Kosovë e Metohi, lufta kundër mafias, ruajtja e sovranitetit dhe pavarësisë serbe, përshpejtimi i reformave dhe vazhdimi i rritjes ekonomike”.

Më së shumti vëmendje në Beograd ka zgjuar synimi i publikuar për luftën kundër mafias, për të cilën Vuçiqi thotë se është në vazhdim e sipër, por tani do të intensifikohet më shumë. Gazetari Nedim Sejdinoviç thotë se Vuçiçi “shumë herë ka paralajmëruar luftën kundër mafias si një prej synimeve kryesore, por kjo është vetëm vazhdimësi e demagogjisë së tij, sepse është e qartë se në Serbi vitet e fundit kemi një rritje të lartë të kriminalitetit dhe korrupsionit. Kjo luftë nuk do të sjellë asgjë, sepse për Serbinë është karakteristikë e veçantë ndërlidhja e fuqishme e organizatave kriminale me pushtetin“.

„Më shumë do të doja që Vuçiçi të thoshte se do ta luftojë korrupsionin“, thotë Vesna Malishiç, redaktore e gazetës NIN.

“Është tërësisht e pabesueshme që për tetë vite askush nuk është arrestuar dhe nxjerrë para drejtësisë, përkundër aferave tepër të mëdha korruptive që kemi pasur“, thotë Vesna Malishiç.

Nder apo degradim?

Habi ka shkaktuar edhe vendimi që Ivica Daçiq të emërohet si kryetar i Parlamentit të Serbisë. Ai tha se e ka për “nder që të jetë kryetar i Kuvendit të Serbisë“, por ky hap kosiderohet si degradim i Daçiqit dhe Partisë së tij Socialiste (SPS). Gjatë tetë viteve të kaluara Parlamenti ka përjetuar një degradim të madh, ku qëllimi kryesor është të evitohet veprimi i opozitës që të flasë publikisht. Nedim Sejdinoviç thotë se me këtë veprim është degraduar edhe roli i SPS. “Parlamenti dhe kryetari i Parlamenti janë margjinalizuar totalisht, sepse këtu kemi një sistem, ku dominon pushteti ekzekutiv dhe një person. Kuvendi nuk do të forcohet me emrimin e Daçiçit si kryetar të tij. Do të thosha madje se ky është një degradim i SPS”, thotë Sejdinoviç.

Vesna Malishiq mendon se Daçiçi nuk mund të refuzojë asnjë ofertë, për shkak të pozitës së tij të dobët dhe numrit të vogël të votave që ka fituar në zgjedhje. Por mbetet të shihet nëse SPS do të ketë edhe ndonjë post ministror në qeveri.

Lufta kundër djathtistëve

Presidenti Aleksandar Vuçiç foli edhe për rritjen tepër të madhe të disa forcave djathtiste në Serbi, të cilët po fuqizohen me parullat kundër migrantëve dhe qëndrime tepër të thjeshtësuara. Vuçiqi përpiqej të linte përshtypjen e një personi shumë të shqetësuar kur fliste për këtë fenomen, e në këtë kontekst përmendi vetëm Sasha Radulloviçin, ndonëse në Serbi ka dhe persona të tjerë me qëndrime radikale.

Bashkëbiseduesit e DW e shohin këtë deklaratë të tij si shumë cinike dhe si një përpjekje për të injoruar dhe minimizuar rolin e orgniazatave djathtiste. Nedim Sejdinoviç thotë se ekzistenca e organizatave të tilla i shkon në favor Vuçiçit, e disa prej tyre burojnë madje nga vet pushteti i tanishëm. SNS i shfrytëzon këto organizata për t’u pozicionuar si një organizatë e matur politike, që në fakt nuk është. Por Vuçiçi e shfrytëzon këtë para faktorëve ndërkombëtarë për t’u prezantuar si politikan i matur dhe për të dëshmuar se ai lufton organizatat ekstreme.

Vesna Malishiç thotë se pikërisht Vuçiçi “u ka dhënë hapësirë këtyre organizatave djathtiste dhe ultra djathtiste, sepse askush prej tyre nuk është arrestuar apo nxjerrë para drejtësisë për shkak të shkeljes së të drejtave të njeriut të të tjerëve në Serbi“.

Vuçiç tha se kryetari i ri i Kuvendit Ivica Daçiç do të duhej të zhvillonte dialog me këto organizata, por Vesna Malishiç mendon se një dialog i tillë është i pamundur, sepse në Parlamentin e Serbisë nuk do të ketë më opozitë të mirëfilltë. Ndërsa tani do të bëjnë ndonjë shou për kinse dialog me opozitën dhe lëvizjet djathtiste.

Fillimi i fushatës elektorale

Presidenti i Serbisë Vuçiç tha se kjo qeveri do të ketë një mandat të kufizuar, që sipas analistëve dëshmon se ndaj tij dhe ndaj Serbisë ekziston një presion i Perëndimit, pasi pas zgjedhjeve të fundit është konstatuar se në Serbi është anuluar në fakt sistemi shumëpartiak. Ky mund të konsiderohet edhe si një lloj suksesi i vogël i opozitës që i ka bojkotuar zgjedhjet, për shkak të mungesës së kushteve të barabarta për zgjedhje të lira.

Vesna Malishiç thotë madje se paraqitja e Vuçiqit para opinionit ishte në fakt edhe fillimi i fushatës së re parazgjedhore. “Është e qartë se Vuçiqi nuk mund të funksionojë pa fushata dhe se për të është një periudhë tepër e gjatë pritja katër vjet e zgjedhjeve normale. Ndaj ka paralajmëruar që zgjedhjet do të mbahen më parë”, pohon Malishiç./DW/