Londër, mrekullia “Polaritete të ndërthuruna“ e Xhevahir Kolgjinit në “The Holy Art Gallery“

Në “The Holy Art Gallery” në Londër u hap ekspozita kolektive “Wonders” /Lexo shqip: “Mrekullitë”/ ku një nga mrekullitë e kësaj ekspozite është edhe vepra e piktorit të njohur shqiptar, Xhevahir Kolgjini, “Polaritete të ndërthuruna” (‘Intertwined Polarities’).

“Xhevahir Kolgjini asht një nga piktorët ma të pangjamë, jo vetëm ndër artistët shqiptarë, por edhe ma gjanë. Aj ka arrijtë që nëpërmjet teknikës së punimeve artizanale të qilimave me i shprehë vizioniet e tij artistike. Një kombinim mjeshtror i traditës sonë dhe i modernitetit. Kjo asht një teknikë që përdoret shum rrallë nga artistët, jo vetëm për shkak të metarialit specifik, por për shkak të punës fort të lodhshme e të mundimshme që duhet m’ia kushtu kësaj mënyre të punës,” shprehet artisti shqiptar Agim Morina pas hapjes së ekspozitës në Londër, duke shtuar se vepra është njëra prej dhjetëra punimeve të këtij vargu, disa të realizueme tashmë e disa në punë e sipër – ku shfaqet një “femën vitruviane”, një asocim interesant me “mashkullin vitruvian” të Da Vinçit.

Figura (akti) i femnës, që nëpërduket ndërmjet qinda mija fijesh të enduna pambuku e leshi, kridhet e shkridhet në sipërfaqe me një lojë harmonike ngjyrash.

Kjo ekspozitë do jetë e hapur deri me 30 tetor, nga ora 11:00 deri në orën 17:00, në The Factory, 21-31 Shacklewell Ln, London E8 2DA.

Ndryshe, Xhevahir Kolgjini aktualisht është ligjërues në Universitetin Amerikan të Kosovës.