Lorenc, Saimir Tahirin po e arreston Edi Rama. A thua Pse?!

Gjashtë muaj më parë, të gjithë e kujtojnë pretencën e Ish-ministrit të Brendshëm, Saimir Tahiri në Gjykatën për liritë dhe të drejtat e politikanëve “Opinion”, kur ai me lot në sy iu drejtua njërit prej panelistëve:

“Lorenc unë po arrestohem, unë po shkoj në burg!”

Publiku i shkretë, i manipuluar nga propaganda 3D e qeverisë, me kazanë ose gjellërat e ERTV-s, sikur u bindë se “Edi edhe ja venë prangat!”

Të nesërmen e kësaj drame, Saimir Tahiri filloi maskaradën e rradhës duke i vënë në rresht Prokurorët e Krimeve të Rënda dhe duke krijuar idenë se sa i fortë na qenka një ministër i akuzuar për trafik ndërkombëtar të drogës.

Ky Akti i dytë ishte më mbreslënës për kriminelë dhe jo vetëm! Të gjithë po shikonin se “kush, kujt po i bënte zbor”, që prokurorët e krimeve të rënda kishin ulur kokën ndërsa Tahiri nuk ishte ai i Opinion-it me lot në sy. Pse-të ishin të shumëta!

Kur Edi Rama me Vettingun e tij arriti të “shuaj” Gjykatën Kushtetuese, dhe gjykatësit e prokurorët po kërkojnë vrima se ku të futen, kur timonin e Vettingut të Reformës në Drejtësi e mori Taulanti me shokë, sërish del Saimir Tahiri tashmë në Aktin e tretë të dramës së tij. Edhe pse kufomë politike, i karbonizuar plotësisht nga socialistët dhe rilindasit, ai del në skenën politike dhe tenton të ndezë një zjarr kot. Pse?!

Kur Saimirit i duhej Rama, ai ishte aty dhe e ndihmoi. Tani kur Ramës i duhet për të ndezur zjarrin qoftë edhe me një copëz hiri, Saimir Tahiri është në krye të detyrës. Del kot, dorëzon mandatin e deputetit, mbushë ekranet televizive dhe çuditërisht, për ti sqaruar veprimet e tij si në epokën kur thuhej “gjykatat i ka Saliu”, nuk ka vend në ERTV dhe në Gjykatën për liritë dhe të drejtat e politikanëve “Opinion”, por në një tjetër ekran.

E meqë “gjykatat nuk i ka Saliu” tani ai nuk është më me lot në sy. Madje nuk ka frikë as nga prangat si gjashtë muaj më parë, dhe na bënë heroin. Therorësi e çuditshme e një njeriu që qante para Lorencit dhe sot nxjerr gjoksin para gjykatave! Çon dëm jo vetëm Reformën në drejtësi por edhe librat e historisë. Ç’kuptim ka tani Mic Sokoli kur e kemi Saimir Tahirin, i karbonizuari që djeget për eurointegrimet e Shqipërisë! Tashmë edhe akuzat për trafikim ndërkombëtar të drogës do të zbehen ose trafikanti do të marr tjetër kuptim, eurointegrues. Edhe në Kodin Penal duhet futur duart, si do të vepron Ligji me një trafikant droge që kontribuon në integrimin e Shqipërisë në BE. Precedent që do t’ia vlejë edhe për Konferenca të shkencave juridike!

E ku është Edi Rama në gjithë këtë zallamahi rilindase. Ku tjetër veçse në “Opinion”. Fillimisht Aktin e Ish-ministrit të Brendshëm për të dorëzuar mandatin e deputetit e cilëson “dinjitoz”. Dhe jo vetëm kaq: “Mjaft dinjitoz në kujtesën time, i pari i këtij lloji në parlamentin shqiptar,” tha Rama; Aq dinjitoz ishte sa nuk e la të transmetohet në ERTV.  Por kyemministri përveç hipokrizive e tha një të vërtetë: Në parlamentin shqiptar ka pasur gjithçfarë soji të kriminelit, por trafikant ndërkombëtar të drogës kurrë!

Dhe, pa u bërë as 24 orë nga dorëzimi i mandatit të Tahirit, Edi Rama qartësohet me opinionin dhe mandatin e Tahirit ndërsa shpëtimtari i shqiptarëve, SHBA për përmasat kriminale të ish-ministrit.

Pas reagimit të liderit të opozitës, Lulzim Basha se “Tahiri dorëzon mandatin pasi shkatërroi provat kyçe dhe transferoi thasët me euro, dhe kur u eliminua dëshmitari kyç i bandës së Habilajve, ai që bënte pagesat, Nazer Seiti,” Edi Rama kthehet në identitet, jo për ti treguar Lorencit por për ta paralajmëruar opozitën, siç bëri me gjykatësit dhe prokurorët. Saimiri nuk është i fundit që do të arrestohet thotë kryeministri, e ndërsa hidhet në peshore si nga opozita ashtu edhe rilindasit, nëse është peshk i madh apo cironkë, Ambasadori amerikan në Tiranë, Donald Lu e thotë të qartë se Saimir Tahiri është peshk i madh.

Po, i madh, përkundër faktit se ka gjashtë muaj që Edi Rama po mundohet ta fus në konservë si sardele pikante.  Por Lorenc, cironkë, sardele ose peshk i madh, sidoqoftë Saimir Tahiri, Edi Rama e bëri të qartë se po e arreston jo se shkeli Ligjin, jo për eurointegrime por për të arrestuar opozitën. Thonë janë grahmat e fundit të një pushteti të kalbur, por mund të paralajmërohet më shumë se kaq. Këtë më së miri e sqaron Profesorja e Historisë Evropiane dhe Botërore të shekullit të 20-të në Universitetin e Mariborit, Jerca Vodushek Stariç: “Neostalinizmi shfaqet duke thënë: ose je i yni, ose nuk je; nëse nuk je i yni, atëherë i djathtë, ose ke një fobi tjetër.”