Lufta franko-amerikane për dinjitetin e Berishës!
nga Agim Popoci
“Kam udhëzuar avokatin tim në një vend neutral dhe të respektuar, siç është Franca, që të ngrejë ndaj zotit Blinken një padi direkte para Gjykatës Korreksionale të Parisit, për shpifje publike.” Ky vendim i Ish-Presidentit, Sali Berisha krijoi idenë se po hapet një epokë e re ligjore dhe historike pas shpalljes së tij NON GRATA nga Departamenti amerikan i Shtetit ndonëse kemi të bëjmë me hapjen e një epoke të re diplomatike pas Brexitit, nga njëra prej kryeqendrave më të korruptuara politike në Evropë, Parisi! Pse?!
Përgjigja më e rëndësishme dje dhe sot është pse Sali Berisha NON GRATA pikërisht në këtë kohë, para asaj pse në Paris mund ti rikthehet dinjiteti një politikani, qoftë ai edhe nga Shqipëria, shtuar këtij fakti se po mbrohet nga avokati i famshëm francez, Jean-Yves Le Borgne.
Duke e shpallur NON GRATA, Sekretari amerikan i Shtetit, Antony Blinken tha se aktet e korrupsioni të Ish-Presidentit të Shqipërisë, Sali Berisha, minojnë demokracinë në Shqipëri.
Gjatë karrierës së tij politike, Sali Berisha kishte shumë momente për tu akuzuar se po minon demokracinë në Shqipëri edhe nga amerikanët! Sot mund të mos jetë moment i duhur ose siç druan analisti amerikan Janusz Bugajski, ky veprim mund të shihet edhe si një veprim anti-shqiptar, por të thuash sot se ky vendim nuk ishte i mirëmenduar tejkalon imagjinata të shumta nga Pakti i Varshavës që as sot nuk e pranojnë se kush është Amerika.
Shqiptarët kanë plotësisht të drejt kur akuzojnë sot Edi Ramën për masakër elektorale më 25 Prill dhe kërkojnë përgjegjësitë e këtij krimi elektoral para drejtësisë, por kjo është axhendë e shqiptarëve dhe askush nuk ua mohon; Dhe, kjo nuk ka të bëjë as me SHBA dhe as me Sekretarin e saj të Shtetit.
Por as shqiptarët nuk duhet të mohojnë axhendat e SHBA dhe Sekretarit të Shtetit që ndryshe nga shqiptarët e dinë se kush është Sali Berisha dhe cili është impakti i tij ndër shqiptarë!
Amerikanët e dinë se angazhimi i tyre për Reformën në Drejtësi, Byronë e Hetimit ose dhe zgjidhjen e çështjes së Kosovës nuk mjafton nëse ata flasin në çdo takim pavarësisht natyrës; Ose kur këtë e ndihmon Edi Rama ose e sulmon Ilir Meta! Por, tashmë e dinë edhe sikur t’i kenë rënë shkurt amerikanët kësaj historie dhe gërmimit në bëmat e Sali Berishës, kjo tronditje e madhe shqiptare e pësuar me shpalljen NON GRATA të Sali Berishës, lehtësisht mund të merrte tjetër drejtim sikur lidershipi shqiptar të mos ngatërronte miqtë, Evropën dhe Amerikën.
Është e drejt legjitime e Sali Berishës të mbrojë dinjitetin e tij dhe të familjes, por kur këtë mundohet ta bëjë përmes një gjykate evropiane, madje edhe më keq, franceze, kjo e humb kuptimit duke u shndërruar edhe në luftë diplomatike franko-amerikane për dinjitetin e Berishës.
Sot, Franca, si një shtet që mbahej si “nona e diplomacisë”, edhe mund ti jap leksion Shteteve të Bashkuara mbi veprimet e shefit të diplomacisë dhe vendimeve të tij.
Por, sot kur në Francë vazhdojnë të diskutojnë për gjyqin e fundit të 14 zyrtarëve dhe politikanëve, përfshirë Ish-Presidentin e Republikës, sondazhet tregojnë se 75 për qind e vetë francezëve mendojnë se politika është e korruptuar,
Sot, është e qartë se avokati Jean-Yves Le Borgne do të dal shumë shpejtë duke tundur vendimin e Gjykatës Korreksionale të Parisit, ku konstatohet se akuzat e Sekretarit amerikan të Shtetit, Antony Blinken ishin të pabaza!
Por, gjithashtu është e qartë se Sali Berisha do të vazhdoj të jetë NON GRATA në SHBA edhe pas këtij vendimi!
Sot, Sali Berisha si NON GRATA është e vërtetë se nuk mund të ketë ndikimin që kishte ndër shqiptarë për të mos dhënë miratimin për ndryshimin e kufijve në Ballkan, me argumentet historike e territoriale rreth të ardhmes së shqiptarëve, ashtu siç është e vërtetë se kjo mund të jetë edhe arsyeja “e ndëshkimit”.
Por, këtë ndryshim të kufijve para se ta miratoj Administrata Biden për hir të stabilitetit në Ballkan, e ka bërë pikërisht Franca duke e ndarë Kosovën pa pyet njeri dhe pa e shpallur NON GRATA.
Sot, kur ndër demokratë, politika dhe autoriteti i Ambasadorit të SHBA në Tiranë është në nivelet më të ulëta që nga ekzistimi i shtetit shqiptar, për shkak të zhvillimeve politike dhe strategjisë së gabuar të lidershipit si në Departamentin e Shtetit ashtu dhe në PD, pak rëndësi ka nëse Sali Berisha është ose jo NON GRATA.
Sot shqiptarët janë nëpërkëmbur dhe keqëtrajtuar nga Edi Rama, dhe pa u vënë drejtësia në vend nuk ka miqë, Evropë dhe koalicion qeverisës që e zgjidhë këtë situatë, madje as ai PD-PS të cilin e trumbeton Edi Rama dhe thuhet se është “ndëshkuar” Sali Berisha.
Në fund, po, është e vërtetë se nuk ka miqë, Evropë dhe koalicion qeverisës, sikur edhe mos ta pengoj Sali Berisha, që e zgjidhë këtë situatë. Por, ama, është një zgjidhje! Për ta shpëtuar shtetin shqiptar, pavarësisht planeve të Serbisë dhe Moskës, Francës dhe Gjermanisë, Vuçiçit dhe Ramës, si gjithmonë, Zoti dhe Amerika janë aty t’u mbajnë dorën horrave.
Kush e mendon ndryshe, nuk ka Gjykatë Korreksionale, madje as ajo e Parisit që i bënë derman!
