Lufta Izrael-Iran, mediat ruse: Kjo është mundësia jonë strategjike

Konflikti ndërmjet Iranit dhe Izraelit dominon sot në faqet e para të gazetave ruse dhe shumë komentues në Moskë e vëzhgojnë përshkallëzimin në Lindjen e Mesme përmes prizmit të interesave të tyre gjeopolitike.

“Sado cinike që mund të tingëllojë, ky konflikt në nivelin taktik sjell edhe përfitime të caktuara për Rusinë”, raporton tabloidi Komsomoli Moskovit, duke vënë në dukje rritjen e çmimit të naftës dhe uljen e vëmendjes së Perëndimit ndaj luftës në Ukrainë. “Kievi është harruar”, thuhet në tekst, raporton korrespondenti rus i BBC-së, Steve Rosenberg.

“Kjo largon vëmendjen e kundërshtarëve tanë nga Moska”

E përditshmja e biznesit Kommersant shkon një hap më tej: “Çdo përshkallëzim në Lindjen e Mesme shpërqendron kundërshtarët e Moskës nga Ukraina dhe ndryshon prioritetet e ndihmës ushtarake perëndimore”.

Në këtë kontekst, analistët rusë sugjerojnë se Moska mund të përpiqet të luajë rolin e një “ndërmjetësi të paanshëm” – jo domosdoshmërisht për të zgjidhur krizën, por të paktën për të ndihmuar në depërshkallëzimin e saj. Kjo, beson Kommersant, do të forconte ndikimin politik të Rusisë në rajon.

Megjithatë, e njëjta gazetë paralajmëron se Moska nuk ka arritur të parandalojë një sulm izraelit ndaj Iranit, vend me të cilin nënshkroi një marrëveshje gjithëpërfshirëse strategjike vetëm pesë muaj më parë. Kjo hedh një hije dyshimi mbi fuqinë e saj reale në rajon dhe ngre pyetjen se sa ndikim mund të ketë realisht në ngjarjet jashtë hapësirës post-sovjetike.