Luftë me flakët/ Zjarr i madh në Derviçan, rrezikohen zonat e banuara

Një zjarr i përmasave të mëdha ka rënë sot në Dropull, midis Derviçanit dhe Goranxisë. Aktualisht raportohen rreth 2 ha kullotë e djegur, janë prekur rreth 50 pisha ndërsa po luftohet me përhapjen e zjarrit pranë zonave të banuara.

Mësohet se janë dy makina zjarrfikëse në terren e gjithashtu po punohet edhe me mjete rrethanore si pasojë e terrenit malor.

Forcat zjarrfikëse po luftojnë me përhapjen e zjarrit pranë zonave të banuara ndërsa zjarri po përhapet me shpejtësi, e sipërfaqja e kullotave përfshirë nga zjarri është shtuar.

Ndryshe, zjarret në Dropull tashmë janë problematikë e përvitshme. Gjatë 2018 në Gjirokastër u shënuan 80 vatra zjarri ndërsa viti 2017 kishte bilanc më dramatik ku në të gjithë qarkun e Gjirokastrës u dogjën më shumë se 700 ha kullota dhe pyje. Këtë vit përgjatë korrikut në Gjirokastër u regjistruan vetëm 4 vatra zjarri, ndërsa kjo është vatra e dytë e zjarrit në Dropull brenda javës.