“Luftë në Kavajë”/ Pampuri: Lleshaj godet kundërshtarët politik, krimi bënë terror!
Pas ngjarjes tragjike sot në Kavajë ku me rastin e përplasjes së bandave mbeti i vrarë kalimtari i rastit ndërsa kishte blerë bukë, reagon Ish-Deputetja e PD, Orjola Pampuri, duke theksuar se bilanci i luftës në Kavaje sot provon sa të pasigurt jemi ne, familjarët tanë, fëmijët tanë, kur qeveria heq dorë nga puna e saj dhe bëhet ortakë me krimin për të ruajtur karrigen e paligjshme.
“Krimi i sotëm me një viktimë të pafajshme mund të mos kishte ndodhur, nëse qeveria, ministri i Brendshëm dhe policia nuk do të ishin përqendruar të godasin kundërshtarët politikë, të bëjnë terror nëpër qytete, por të parandalonin krimet dhe të vendosnin rregull,” thekson Orjola Pampuri përmes rrjetit social Facebook dhe duke shprehur ngushëllime të sinqerta familjarëve të Ramazanit të ndjerë, shpreh bindjen se e vetmja mënyrë për të shpëtuar veten dhe vendin nga kjo pasiguri si në kohë lufte, është të largojmë këtë qeveri.
Ndryshe, pas një konflikti në mes të vëllezërve Hyka dhe Alia, sot ka pasuar përplasja me armë në mes dy bandave në Kavajë, ku për pasojë ka mbetur i vrarë kalimtari i rastit, Ramazan Hasalliu, 50 vjeç dhe janë plagosur disa të tjerë.
Ja statusi i plotë:
Shqipëria vendi, ku jeta e një qytetarit nuk është e sigurtë as tek dyqani i lagjes.
Sa herë në Shqiperi ka ngjarje të rënda, përplasje bandash, apo viktima si Ramazani i ndjerë sot në Kavaje, tronditja dhe pasiguria janë ndjesitë më të forta që na përfshijnë.
Por bilanci i luftës në Kavaje sot, me 1 viktimë të pafajshme, që po blinte bukën e familjes në dyqanin e lagjes dhe me disa të plagosur, është revoltues. Ai provon sa të pasigurtë jemi ne, familjarët tanë, fëmijët tanë, kur qeveria heq dorë nga puna e saj dhe bëhet ortakë me krimin për të ruajtur karrigen e paligjshme.
Krimi i sotëm me një viktimë të pafajshme mund të mos kishte ndodhur, nëse qeveria, ministri i Brendshëm dhe policia nuk do të ishin përqëndruar të godasin kundërshtarët politikë, të bëjnë terror nëpër qytete, por të parandalonin krimet dhe të vendosnin rregull. Duke u shprehur ngushëllime të sinqerta familjarëve të Ramazanit të ndjerë, shpreh bindjen se e vetmja mënyrë për të shpëtuar veten dhe vendin nga kjo pasiguri si në kohë lufte, është të largojmë këtë qeveri.
