Lugina Preshevës ka nevojë urgjente për mbështetje ndërkombëtare

nga Shaip Kamberi*

Pas deklaratës së ministrit serb, Demo Berisha, se “Plani shtatë pikësh” është dokument i tejkaluar dhe se “duhet nisur dialog për kërkesa të tjera”, si dhe pas veprimit të kryetarit të Komunës së Bujanocit, i cili në emër të shqiptarëve – pa asnjë koordinim paraprak me spektrin politik shqiptar – i ka dorëzuar ministrit serb një “dokument me dhjetë pika”, e cila shihet si përpjekje për të devijuar nga obligimet ndërkombëtare të marra nga Qeveria e Serbisë me miratimin e “Planit shtatë pikësh” më 4 qershor 2013, si dhe pas miratimit të “Planit Aksional” (2022) për zbatimin e këtij dokumenti për periudhën 2023–2025, bashkë me kryetarin e KKSH, z. Enkel Rexhepi, kemi ndërmarrë sot disa reagime të drejtpërdrejta në disa qendra vendimmarrjeje politike dhe ndikimi ndërkombëtar, duke kërkuar që të ndërpritet çdo tentativë për sabotim të procesit të afirmimit të të drejtave të shqiptarëve në Luginën e Preshevës.

Bashkërisht me z. Rexhepi i jemi drejtuar presidentit dhe kryeministri të Serbisë, duke theksuar qartë se për ne është e papranueshme çdo tentativë për të fituar kohë apo për të shtyrë zbatimin e obligimeve që dalin për Serbinë nga “Plani shtatë pikësh” dhe “Plani Aksional”.

Duke pasur parasysh se OSBE, delegacioni i BE-së në Beograd dhe Ambasada e SHBA-së kanë qenë ndërmjetësues dhe mbështetës të procesit të miratimit të “Planit me shtatë pika”, u jemi drejtuar edhe këtyre përfaqësive diplomatike me kërkesën që, përmes ndikimit të tyre, të parandalojnë çdo proces devijues dhe manipulativ.

Njëkohësisht, me një letër informuese i jam drejtuar edhe Kryeministrit të Republikës së Shqipërisë z. Edi Rama dhe Kryeministrit të Republikës së Kosovës, z. Albin Kurti, duke kërkuar angazhim maksimal diplomatik për të ndaluar përpjekjet që po synojnë të relativizojnë dhe të zëvendësojnë procesin e dakorduar ndërkombëtarisht me iniciativa të njëanshme, të promovuara nga ministri serb Demo Berisha në bashkëpunim me kryetarin e Bujanocit, Arbër Pajazitin, si dhe me disa individë të shoqërisë civile.

Lugina e Preshevës ka nevojë urgjente për mbështetje të fuqishme politike dhe diplomatike në qarqet ndërkombëtare, në mënyrë që kërkesat e saj legjitime të marrin drejtimin e duhur dhe të gjejnë zbatim real.

*Deputet në Parlamentin e Serbisë