Lulzim Basha e përjashton, Flamur Noka: Peng, merr urdhra nga Edi Rama!

Në PD përjashtohesh edhe pa urdhrin e Amerikës! Sot Kryetari i Partisë Demokratike, Lulzim Basha, ka shkarkuar Flamurin Nokën nga posti i Nënkryetarit të Komisionit të Sigurisë, si dhe ka paralajmëruar përjashtimin e tij nga Grupi Parlamentar i PD, me arsyetimin se për të baltosur Kryetarin dhe Partinë Demokratike ka sajuar diskutime apo qëndrime, të pathëna dhe të paqena. I menjëhershëm ishte reagimi i Flamur Nokës duke theksuar se ai që shpif është zoti Basha i cili me këtë veprim tregoi sot se është një peng që merr urdhra nga Edi Rama!

Vendimi i Kryetarit të PD, Lulzim Basha, erdhi pas deklaratës së deputetit Flamur Noka me përfundimin e mbledhjes së Grupit Parlamentar:

“Arsyeja e këtij vendimi është shndërrimi i mbledhjes së Kryesisë së Grupit në laborator të prodhimit të gënjeshtrave për të baltosur Kryetarin dhe Partinë Demokratike, duke sajuar diskutime apo qëndrime, të pathëna dhe të paqena. Këto shpifje dhe sajesa të herëpashershme dhe të përsëritura, dëmtojnë interesin e Partisë Demokratike dhe të demokratëve, duke shfokusuar vëmendjen e betejës së opozitës ndaj të vetmit kundërshtar që është armiku i Shqipërisë dhe shqiptarëve Edi Rama,” thekson Partia Demokratike përmes një njoftimi.

Deputeti i PD, Flamur Noka, duke reaguar thekson se Lulzim Basha me këtë veprim tregoi se e ka përfshuirë paniku dhe ai që shpif është zoti Basha, sepse vetë Noka kishte kërkuar që në mbledhje të grupit të mbahet protokoll në mënyrë që të mbeten gjurmë.

“Basha tregoi sot se është një peng që merr urdhra nga ai që e ka marrë peng. Është e qartë që Edi Ramës nuk i duhet Flamur Noka në atë parti dhe këtë e bën shegerti i tij në PD. Jam në atë parti që nga fillimet e saj. Basha gjithmonë është fshehur pas të tjerëve dhe gjithmonë ka ecur me torinë ‘hedh gurin dhe fshih dorën’. Ky është një vendim anti-statutor. Ai merr vetëm urdhra nga shefi i tij sepse ai vetëm këtë di të bëjë. Basha është në panik. Me këtë veprim tregoi se e ka përfshuirë paniku,” tha Noka për AbcNews duke shtuar se vetëm ikja e tij duhet sepse po e kthen PD-në në apendiks të Rilindjes.

“Duke qenë se unë jam nga ata zëra që nuk bëj kompromis me vlerat e PD dhe anëtarësia e saj, ai nuk i duron dot këto. Pa më të voglin merr vendime të tilla, thjesht dhe vetëm thjesht për t’i lehtësuar mbledhjet sepse ai është mësuar të bëjë vetëm monolog dhe nuk pranon dialog apo ide të tjera.Ai që shpif është zoti Basha. Unë në mbledhje të grupit kam kërkuar që në mbledhje të mbahet protokoll sepse duhet të mbeten gjurmë. Fatet e PD janë në rrezik për shkak të vendimeve të Bashës. Ai po e kthen opozitën siç e ka kërkuar Rama prej shumë vitesh,” tha deputeti i PD, Flamur Noka duke sqaruar sërish se i kishte kërkuar Bashës të mos bëjë presione anëtarëisë që të mos e firmosin peticionin dhe ai i ishte kthyer me një lumë akuzash duke e quajtur “llum” anëtarësinë e PD-së.

Ndryshe, dje në përfundim të mbledhjes të Grupit parlamentar të PD, deputeti Flamur Noka, i pyetur nga gazetarët sqaroi debatin e mbrëmjes së dielës i cili u publikua në media ku, u tha, se Kryetari Lulzim Basha, anëtarësinë dhe elektoratin e PD i cilësoi, llum!

“Shqipëria nuk ka pasur në këto 30 vite demokraci një kundërshtar që t’i thotë ‘llum’ anëtarët e PD-së Basha mbrëmë i bëri poshtërimin e radhës anëtarësisë dhe elektoratit të PD duke e quajtur ‘llum’, Askush nuk ka guxuar, as Fatos Nano as Edi Rama as kundërshtarët më të egër të kësaj force politike, të konsiderojnë qeverinë e Sali Berishës si ‘llum’. Askush nuk ka guxuar, përveç Bashës,” tha Flamur Noka duke shtuar:

“Mbrëmë i kërkova të marrë përgjegjësi. Forca jonë politike po shkon në zgrip, falë vendimit okult të Bashës. Nëse do e donte sadopak këtë forcë, do jepte dorëheqjen për ta bashkuar këtë forcë, Basha mbrëmë konfirmoi se fati i karriges së tij është më i shtrenjtë se fati i PD e demokratëve. Kjo gjë në një forcë demokratike, kurrë nuk mendohej se do ndodhte, Basha mbrëmë konfirmoi fatin e karriges së tij,” përfundoi deputeti i PD, Flamur Noka i bindur se “Foltorja” është zgjidhja, alternativa dhe i vetmi shans për ta mbajtur Partinë Demokratike të bashkuar, ashtu siç e do baza e cila është kundër përçarjes që shkaktoi Lulzim Basha.