Lulzim Basha i jep hua Edi Ramës “këshilltarin gjerman”: Do të pranojmë çeljen e negociatave!

Demokratët e njohin nga çadra si mbështetës i Lulzim Bashës, socialistët e Edi Ramës e pagëzuan në vitin 2018 si “këshilltar të Bashës” ndërsa mediat në shërbim të tij folën për para të majme që deputeti kristiandemokrat në Bundestag, Gunther Krichbaum, folës i grupit parlamentar CDU/CSU për çështje të Bashkimit Evropian na paska marrë meqë tha se “nuk është koha për Shqipërinë të çelë negociatat”.

Madje deputeti socialist Erjon Braçe përmes një letre të hapur i thotë: “Kurre nuk do arrish tek parimësia, të rrënon modeli ‘Lulzim Basha’!”

Katër vjet më pas, pra dje, kur Shqipëria është në gjendje edhe më të rëndë se sa në vitin 2018, në çdo aspekt, si atë ekonomik, politik dhe me sundimin e ligjit, po ky deputet gjerman, Gunther Krichbaum, pas vizitës së Kryeministrit Edi Rama në Berlin, lavdëron dështimin më të madh në historinë e shtetit shqiptar, vettingun ndërsa fajëson Bullgarinë pse nuk u çelën deri sot negociatat!

“Pra, kanë lëvizur shumë gjëra në një drejtim pozitiv vitet e fundit. Nëse nuk do të ishte kështu, nuk do të pranojmë çeljen e negociatave. Që këto kanë vonuar, për këtë nuk e ka fajin Shqipëria, por bllokada e Bullgarisë ndaj Maqedonisë së Veriut,” tha në një intervistë për DW, “këshilltari i Bashës” që tashmë pas bashkëqeverisjes flet me superlativa edhe për Edi Ramën dhe pushtetin e tij.

Dhe jo vetëm kaq!

Edhe për zhvillimet në PD, Krichbaum ishte po ai i çadrës dhe viteve 2016 e 2018 në krah të Lulzim Bashës, ose siç e përshkruan socialistët, Edi Rama dhe dora vetë Erjon Braçe, “i rrënuar nga modeli Lulzim Basha”. I pyetur nësa do ta refuzon PD-në nëse në krye të saj vjen Sali Berisha, edhe pse tha se nuk i takon CDU të ndërhynë, e bëri këtë dhe personalisht tha se do të vazhdoj të punoj dhe ta mbështes PD-në vetëm nëse jepet një sinjal largpamës në përzgjedhjen e kryetarit.

“Nëse nuk do të jetë kështu, por do të ketë kthim në të djeshmen, në mos të pardjeshmen, atëherë kjo nuk mund të gjejë mbështetjen time personale. Në një rast të tillë, unë do të angazhohesha që të pezulloheshin procedurat për anëtarësim në nivel të Partisë Popullore Evropiane. Sepse ne, si parti Parti Popullore Evropiane duhet të ecim përpara,” tha deputeti kristiandemokrat në Bundestag, Gunther Krichbaum, duke refuzuar të flas konkretisht për Sali Berishën por duke u mjaftuar me sqarimin se u shpreh qartë ndërsa mendon se amerikanët kanë gjetur fjalë të qarta dhe mendon se partia bën mirë që fjalë të tilla të mos i lërë pa i dëgjuar.

“Kurre nuk do arrish tek parimësia, të rrënon modeli ‘Lulzim Basha’!” Ky siç duket është dhe mallkimi socialist i cili e përndjekë deputetin kristiandemokrat në Parlamentin Gjerman, Gunther Krichbaum, folës i grupit parlamentar CDU/CSU për çështje të Bashkimit Evropian i cili sot edhe pse e mbështetë Partinë Socialiste dhe Edi Ramën nuk arriti të bindë dhe Këshillin Evropian për arritjet e Shqipërisë dhe fajin e Bullgarisë.

Këtë e konfirmoi dhe vetë kryeministri Edi Rama në përfundim të vizitës që zhvilloi në Berlin duke paralajmëruar çeljen e negociatave të Shqipërisë me Bashkimin Europian edhe në fund të qershorit ku pritet mbledhja e Këshillit Europian për këtë çështje.

“E kam diskutuar me të gjitha faktin që kemi vendosur se do ndryshojmë kurs. Me gjasë Këshilli Europian i qershorit nuk do të arrijë dot të çajë murin e vendosur nga Bullgaria për Maqedoninë e Veriut. Deri atëherë do qëndrojmë në pozicionin që duhet të hapen negociatat formalisht për të dyja. Në rast se edhe atëherë do të mbetemi peng i një situate që s’ka lidhje me ne dhe asgjë që ka të bëjë me Shqipërinë, do ndryshojmë kurs dhe do kërkojmë me insistim që Shqipëria të trajtohet veç,” tha Edi Rama gjatë një interviste pas vizitës në Berlin, duke fajësoi Bullgarinë ashtu sikur se “këshilltari i Bashës” për vendimin e pritshëm duke përsëritur se në këto rrethana Shqipëria do të ndryshojë edhe kursin e saj.

Ja dhe intervista e plotë e deputetit gjerman Gunther Krichbaum për DW, pas takimit me Kryeministrin Edi Rama në Berlin me mesazhet nga “çadra e Ramës”:

Sot në Bundestag ju hodhët idenë e një modeli të ri për vendet që janë më afër BE-së, por nuk mund ose nuk duan të jenë anëtare të BE-së. A është kjo përgjigja juaj ndaj propozimit të fundit të presidentit francez Macron për krijimin e një formacioni të ri politik përtej BE-së?

Sigurisht që ka të bëjë edhe me sugjerimet e zotit Macron dhe mendoj se do të ishte pozitive që Gjermania dhe Franca  të bashkëpunojnë në këtë drejtim. Sfondi është se vendet që duhet të pranohen sot janë pak më larg standardeve të Bashkimit Evropian sesa ishin dikur vendet kandiduese si Finlanda, Republika Çeke ose Sllovakia. Pra, të mos e gënjejmë veten: sa i përket Ukrainës – dhe unë do të doja që Ukrainës t’i jepej statusi i kandidatit – procesi i anëtarësimit do të kërkojë dekada. Kjo është arsyeja pse është e rëndësishme që ne të ofrojmë një perspektivë të besueshme evropiane, një model për vendet që nuk duan ose nuk mund të bëhen anëtarë të Bashkimit Evropian.

Cilat vende keni parasysh konkretisht?

Për shembull, vendet e Zonës Ekonomike Evropiane (EEA), si Lihtenshtajni, Zvicra, Norvegjia, Islanda dhe Britania e Madhe. Këto vende nuk duan të bëhen anëtarë të Bashkimit Evropian. Por duhet të kemi edhe një model për vendet që ende nuk janë anëtarë të BE-së. Por kjo ide duhet elaboruar. Për mua është e rëndësishme që ky model të kuptohet si një stacion përgjatë rrugës drejt Bashkimit Evropian. Këto vende do të mund ta vendosin vetë, nëse duan të anëtarësohen apo  preferojnë të qëndrojnë aty përgjithmonë, siç janë vendet e EEA, të cilat nuk synojnë të anëtarësohen. Në këtë rast do të kishim një anëtarësim të asociiuar. Ky është një model që nënkupton që në titull se këto vende i përkasin që tani BE-së. Ky anëtarësim i asociuar mund të zgjerohet për shembull me pjesëmarrje në tregun e përbashkët, ose me pjesët e kapitujve që janë të hapur ose që janë përmbyllur. E mundshme ështsë një pjesëmarrje në tregun e brendshëm, ose bashkim doganor. Ky model ende duhet të elaborohet, por mendoj se është një perspektivë e besueshme evropiane.

Ju nuk e përmendët Ballkanin Perëndimor. A do të ishin edhe vendet Ballkanit Perëndimor pjesë e këtij modeli?

Preferoj të flas për Evropën Juglindore ose për vendet e Ballkanit e jo për Ballkanin Perëndimor. Aty ka vende si Sllovenia dhe Kroacia, të cilat tashmë janë anëtare të Bashkimit Evropian, vende, me të cilat tashmë po negociojmë, si Serbia dhe Mali i Zi, vende që janë ante portas (duke hyrë , shën.i red.), pra, drejt çeljes së negociatave të anëtarësimit, të cilat, siç e dini, janë Shqipëria dhe Maqedonia e Veriut. Ka edhe vende si Kosova dhe Bosnja e Hercegovina, të cilave nuk mund t’u  jepet asnjë perspektivë garantuese për momentin. Pra, kemi të bëjmë me gjendje të ndryshme. Pra ky model vlen edhe për shtetet e Ballkanit, në mënyrë që edhe ato të marrin diçka gjatë procesit të negociatave dhe t’u jepet sinjali: Ju do të hyni në BE, edhe pse kjo mund të zgjasë ca. Më lejoni t’ju kujtoj se vendi i fundit që iu bashkua BE-së, Kroacia, kishte negociuar 8 vjet e gjysmë me BE.

Ju sot patët një takim me kryeministrin e Shqipërisë, Edi Rama. Cili ishte qëllimi i këtij takimi?

Ky takim kishte për qëllim që zoti Rama të njihej me kryetarin e CDU-së dhe të grupit parlamentar të CDU/CSU-së, Friedrich Merz. Por në takim merrnin pjesë edhe shoqërues të kahershëm të proceseve të Shqipërisë, si për shembull Joe Wadephul dhe unë. Rama e ftoi Friedrich Merz-in të vinte në Shqipëri ose të bënte një udhëtim në vendet e Ballkanit. Dhe ai jo vetëm që është i hapur dhe i interesuar, por e ka në plan të vizitojë rajonin. Biseduam edhe për progresin e reformave në vend, të cilin personalisht e konsideroj të dalluar. Le të kujtojmë këtu reformën në drejtësi, vettingun. Pra, kanë lëvizur shumë gjëra në një drejtim pozitiv vitet e fundit. Nëse nuk do të ishte kështu, nuk do të pranoim çeljen e negociatave. Që këto kanë vonuar, për këtë nuk e ka fajin Shqipëria, por bllokada e Bullgarisë ndaj Maqedonisë së Veriut. Dhe ne mund t’i bëjmë thirrje Bullgarisë që t’i zgjidhë mosmarrëveshjet në planin dypalësh, sepse ato nuk kanë të bëjnë me negociatat e anëtarësimit në Bashkimin Evropian.

Zoti Rama ka thënë se nëse Bullgaria nuk e heq bllokadën ndaj Maqedonisë së Veriut, ai do të kërkojë shkëputjen. A e mbështesni ju këtë?

Ne si grup parlamentar kemi marrë vendim që këto dy vende të jenë së bashku. Por kam përshtypjen se Bullgaria është duke lëvizur. Kjo është përshtypja ime tani. Shpresoj shumë se mund ta kapërcejmë edhe këtë pengesë.

Dhe së fundi, doja t’ju pyesja për situatën brenda Partisë Demokratike në Shqipëri. Grupi juaj ka qenë gjithmonë i vëmendshëm ndaj situatës së brendshme në Shqipëri, përveç muajve të fundit.

Së  pari, më vjen shumë keq për zhvillimet në PD dhe nuk jam i vetmi. Sigurisht që është çështje e vetë partisë se kë dëshiron të zgjedhë për lider. Neve nuk na takon të ndërhyjmë. Por kjo do të thotë edhe për ne dhe për mua personalisht, se unë do të vazhdoj të punoj dhe ta mbështes PD-në vetëm nëse jepet një sinjal largpamës në përzgjedhjen e kryetarit. Nëse nuk do të jetë kështu, por do të ketë kthim në të djeshmen, në mos të pardjeshmen, atëherë kjo nuk mund të gjejë mbështetjen time personale. Në një rast të tillë, unë do të angazhohesha që të pezulloheshin procedurat për anëtarësim në nivel të Partisë Popullore Evropiane. Sepse ne, si parti Parti Popullore Evropiane duhet të ecim përpara.

Pra, ju do ta refuzoni PD-në, nëse në krye të saj vjen Sali Berisha? 

Besoj se u shpreha qartë ashtu siç e thashë. Partia lipset të marrë një vendim të mençur dhe të marrë parasysh efektin në planin ndërkombëtar, nëse në të vërtetë ndjek pretendimin se jo vetëm dëshiron të bashkëpunojë në nivel ndërkombëtar, por edhe të marrë në dorë drejtimin e vendit. Ky është qëllimi legjitim i një partie në demokraci: që të vijë në pushtet e të formojë qeverinë. Unë mendoj se amerikanët kanë gjetur fjalë të qarta dhe mendoj se partia bën mirë që fjalë të tilla të mos i lërë pa i dëgjuar.