Lulzim Basha: Mitrovica, kryeqytet i kombit shqiptar!
Sot mund të them se kryeqyteti i kombit shqiptar është Mitrovica! Kështu tha Kryetari i Partisë Demokratike, Lulzim Basha, pas takimit me kryetarin e komunës Mitrovicë, Agim Bahtiri, duke u shprehur krenar që PD i është bashkangjitur qëndrimit të drejtë kundër copëtimit të Kosovës.
“Sot mund të them se kryeqyteti i kombit është Mitrovica. Qëndrimi i juaj i qartë dhe i prerë, ka qenë i një vlere të jashtëzakonshme për të përcjellë vullnetin e vërtetë. Në këtë kuadër jam krenar që PD jemi bashkangjitur qëndrimit të drejtë kundër copëtimit të Kosovës dhe ruajtjes së integritetit territorial,” tha Basha duke përgëzuar Agim Bahtirin për ruajtjen e integriteti territorial të vendit.
Kryetari i komunës Mitrovicë, Agim Bahtiri, duke falënderuar Bashën për këtë vizitë, tha se takimin e radhës pret që ta mirëpresë si Kryeministër të Shqipërisë.
“Këtë herë e kam pritur si kryetar partie, e herën tjetër si kryeministër Shqipërie. Këtij vendi i nevojiten njerëz që janë në shërbim të qytetarëve,” tha Agim Bahtiri.
Edhe në Mitrovicë, Lulzim Basha u zotua se vendimi i parë i qeverisë që do të drejtoj është heqja e traut dhe taksës në Rrugën e Kombit.
Pas takimit me kryetarin e komunës Mitrovicë, Agim Bahtiri kryetari i PD, Lulzim Basha, bëri homazhe te varri i Isa Boletinit në Boletin.
Ndryshe, para vizitës në Mitrovicë, sot në ditën e tij të dytë të vizitës zyrtare në Kosovë, kryetari i PD, Lulzim Basha, zhvilloi takim me kryetarin e komunës Prishtinë, Shpend Ahmeti, dhe bëri homazhe te varri i Presidentit Ibrahim Rugova.
