Rrogozhinë, Lulzim Basha: Pranvera sapo ka nisur, ndryshimi po vjen!

Kryetari i Partisë Demokratike, Lulzim Basha, nga Rrogozhina e bëri të qartë nuk do ketë më kthim pas  deri në shembjen e këtij regjim dhe  ndërtimin e një  sistemi të ri politik i cili synon të varrosë fenomenin e Edi Ramës.

Me këtë rast ai premtoi se nuk do të ketë pazar apo kompromis dhe se Partia Demokratike e ka planin për nxjerrjen e vendit nga kriza.

Duke i bërë thirrje banorëve të Rrogozhinës që të bëhen pjesë e protestës së madh në Tiranë më 13 Prill, Lulzim Basha i siguroi: Pranvera sapo ka nisur, ndryshimi po vjen!

 “Hesapet e Edi Ramës dhe armiqve të popullit shqiptar, kriminelëve dhe oligarkëve i prishi opozita me djegien e mandateve dhe largimit nga Parlamentit. Oligarkët shushunja, këta armiq të interesit publik, banda e tyre që mban pushtetin e Edi Ramës, e di fare mirë se çfarë i pret,” tha Luzim duke shtuar se PD ka një plan për nxjerrjen e vendit nga kriza:

 “Ai fillon me marrjen e qindra milionë eurove nga taksat e shqiptarëve nga xhepat e oligarkëve, me anulimin e kontratave korruptive kthimin e këtyre parave tek populli shqiptar.

Pasuritë e vëna mbi gjakun dhe djersën tuaj do të konfiskohen. Kontratat korruptive do të anulohen duke nisur me kontratat e Arben Ahmetajt që helmojnë fëmijët e shqiptarëve, duke filluar me koncesionet e rrugëve, miliona të shqiptarëve që përfundojnë në xhepat e 5 njerëzve.”

Beteja jonë është betejë për të varrosur një herë e mirë fenomenin e Edi Ramës, tha lideri demokrat, fenomenin e politikanit batakçinj, politikanit që futet në xhepat tuaj për të pasuruar një grup njerëzish:

“Kjo do të parandalojë që asnjë njeri, asnjë grup dhe asnjë forcë politike të marrë peng demokracinë në Shqipëri. Beteja jonë do të bëjë të mundur ndryshimin e sistemit.

Drejtësia do të çojë në burg politikanët e korruptuar dhe të lidhur me krimin do të jetë ndryshimi i parë i sistemit. Ndryshim sistemi do të thotë që deputetët e ardhshëm nuk do të caktohen më në mënyrë misterioze.

Ata do ta kenë fatin të lidhur me ju. Ju do të jeni ata që do të përcaktoni me votë deputetët e ardhshëm të Kuvendit të Shqipërisë. Deputetët e ardhshëm nuk do të jenë njerëz, që do ta lidhin fatin e tyre me kryeministrin e ardhshëm.”

100 milionë euro për fermerët

Nga Rrogozhina, aty ku beteja e fermerit me kryeministrin Edi Rama dhe politikat e tij kriminale vazhdon, kryetari i PD-së paralajmëroi rrëzimin e VKM-së, e miratuar së fundmi nga qeveria për uljen e rimbursimit të TVSH-së për fermerët nga 20 në 6%.

“Do t’i japim fund hiles së madhe të ndryshimit të TVSh-së për prodhimet bujqësore. Duke hequr rimbursimin e TVSh-së, Edi Rama ka goditur drejtpërdrejt fermerët shqiptarë. Sepse u ka lënë vetëm tre rrugë, ose të shitet në treg me çmim 14% më të rritur, ose ta shesë me 14% më pak, ose ta sheshe me 14% më pak tek prodhuesi. Ju ka ulur 14% fitimin për çdo kg fasule, qumësht, ose mish. Kur pa protestën e blegtorëve ka shpallur se gjoja do të subvensionojë me 10 lekë qumështin,” tha Lulzim Basha duke shtuar se çdo premtim tjetër, edhe këtë premtim ka një gënjeshtër.

“Askush nuk e beson bandën e tij hajdutëve. Jo vetëm do ta anulojmë këtë VKM korruptive por të rimbursojmë produktet tuaja. Subvencionim 100 mln euro në vit, do të bëjë të mundur që djersa e fermerit të vlerësohet. Me 100 mln euro në vit, fermerët shqiptarë do të jenë më të mbështetur se fermerët në vendet e tjera të Ballkanit.”

S’ka pazare e kompromis me Edi Ramën

Edhe nga Rrogozhona, lider i opozitës përsëriti se protesta e ardhshme e madhe e opozitës së bashkuar  do të jetë të shtunën e ardhshme ndërsa premtoi se nuk do të ketë më kompromis me mazhorancën aktuale, pa arritur përmbysja e sistemit.

“Ne jemi sot shumica dhe do të marshojmë drejt fitores. Fitores së drejtësisë së vërtet që nuk i mbron politikanët e korruptuar, hajdutët që ju kanë robtuar dhe pushtuar.

Mos harroni ky ndryshim i madh erdhi sepse u ngritët ju, u ngritën qytetarët, ju përgjigjet thirrjes time dhe të opozitës.

Ju premtova se 16 shkurti do ta ndante me thikë historinë tonë të re. Nuk do ketë më kthim pas, deri sa ta shembim këtë regjim dhe të ndërtojmë sistemin e ri të vlerave europiane.

Nuk do të ketë pazar apo kompromis mbi sakrificën tuaj, nuk ka zgjidhje tjetër veç një zgjidhje të thellë politike që të bëj që ëndrra e çdo i riu e prindi i Rrogozhinës për një Shqipëri Europiane të behet realitet.”

Në fund, kryetari i Partisë Demokratike ftoi banorët e Rrogozhinës që të bëhen pjesë e protestës së madh në Tiranë, e cila ndryshe nga herët e tjera do të zhvillohet në orët e mbrëmjes. “Ju bëj ftesë që nga zemra të bëheni pjesë e lumit të qytetarëve që do të derdhen në Tiranë të shtunën, mbrëmjen e të shtunës së ardhshme.  Mbrëmjen e të shtunës më orën 18:00, në një bashkim tjetër të madh kombëtar.  Pranvera sapo ka nisur, ndryshimi po vjen.”