Lulzim Basha voton: Sot shqiptarët kanë fuqinë në dorën e tyre, për familjen, vendin dhe kombin!

Ditë historike për shqiptarët të cilët sot kanë fuqinë në dorën e tyre, për familjen, vendin dhe kombin, tha Kryetari i Partisë Demokratike, Lulzim Basha pasi votoi në Qendrën e Votimit Nr.1929 pranë çerdhes numër 13, në njësinë 8 në Tiranë ndërsa ju bëri thirrje qytetarëve të dalin masivisht në votime.

“Sot është një ditë e mrekullueshme për vendin tonë, është një ditë historike, është dita kur të gjithë ne kemi fuqinë në dorën tonë, të gjithë shqiptarët kanë fuqinë në dorën e tyre, të gjithë ju keni në dorë fuqinë tuaj, për fëmijët tuaj, për familjet tuaj, për vendin, për kombin. Sot është dita të dilni dhe të votoni masivisht. Të dilni dhe të bëni me votën tuaj, të mundur të ardhmen që dëshironi për familjen, për vendi tuaj dhe për veten tuaj,” tha Lulzim Basha në praninë e votuesve për herë të parë duke bërë thirrje:

“Sot është dita e Shqipërisë, është dita e demokracisë. Dilni masivisht dhe hidhni votën tuaj. Jam i lumtur që votën time e kam hedhur sot, në praninë e votuesve për herë të parë këtu në lagjen ku kam lindur dhe ku jam rritur dhe i bëj thirrje çdo djali dhe çdo vajze, çdo burri dhe çdo gruaje. Dilni masivisht dhe votoni! Kjo është dita juaj, është dita e demokracisë, është dita e Shqipërisë. Faleminderit! Zoti e bekoftë Shqipërinë!”