Lushnjë, ekzekutohet biznesmeni 35-vjeçar. Ja detajet…

Një 35-vjeçar është ekzekutuar mëngjesin e sotëm në Lushnjë. Mësohet se viktimë e atentatit me kallashnikov ka mbetur Besnik Hida, pronari i një pike të grumbullimit të mjeteve.

Pak minuta pas vrasjes është gjetur një makinë e djegur në lagjen ‘Sarave’, pranë Autostradës në Lushnjë, ndërsa mendohet se i përket autorëve të vrasjes së Besnik Hysën. Sipas policisë, në vendin ku u gjet makina janë gjetur dhe 2 armë kallashnikov si dhe një pistoletë makarov.

Ndryshe, 35-vjeçari është qëlluar me breshëri automatiku rreth orës 08:15, në një lokal në lagjen “Skënder Libohova”.

“Sot rreth orës 08:15, në një lokal në lagjen “Skënder Libohova” Lushnjë, dy persona ende të paidentifikuar, kanë qëlluar me armë zjarri automatike në drejtim të shtetasit B.H, 35 vjeç, i cili ka ndërruar jetë. Autorët janë larguar nga vendngjarja me një automjet ku në ndjekje të tyre janë vënë shërbimet e Policisë Lushnjë.

Policia ka ngritur pika të shumta kontrolli në hyrje-dalje të qytetit , në aksin rrugor Lushnjë Tiranë, Lushnjë Fier dhe Lushnjë Berat.
Për zbardhjen e ngjarjes menjëherë është ngritur grupi hetimor nën drejtimin e Prokurorisë Lushnjë.

Një grup specialistësh nga Departamenti i Policisë Kriminale në Policinë e Shtetit është nisur për t’i ardhur në ndihmë grupit hetimor me qëllim zbardhjen sa më shpejtë të ngjarjes,” deklaron policia.