Lutfiu: Serbët bllokuan rrugën në Bujanoc, tentuan të hynin në komunë

Kryetari i Këshillit Kombëtar Shqiptar, Nevzad Lutfiu, tha se serbët lokal e bllokuan rrugën kryesore të qytetit të Bujanocit për të festuar, derisa disa video tregojnë se ata njëjtit kanë dashur të hynin edhe në komunë.

“Gjatë ditës së djeshme serbët lokal e bllokuan rrugën kryesore të qytetit të Bujanocit për të “festuar” festën e tyre, madje nga videot e publikuara shihet se ata dëshironin të hynin në Komunë, si bandit,” tha Nevzad Lutfiu në reagimin e tij përmes rrjetit social Facebook i bindur se ndaj këtyre veprimeve nuk do të niset asnjë procedurë.

“Ndaj këtyre veprime sigurisht se nuk do të niset asnjë procedurë sepse në pyetje janë serbët. Në vend që shteti të kujdeset për rend dhe ligj, këtu shteti i motivon huliganët.”

Një vit më parë, kujtoi ai ishin dënuar motoristët shqiptarë të Komunës së Bujanocit meqë me rastin e 28 nëntorit bënë një parakalim në qendër të qytetit.

“Vitin e kaluar janë dënuar motoristat shqiptarë të Komunës së Bujanocit për shkak që me rastin e 28 nëntorit bën një paradë në qendër të qytetit. Pak ditë më parë u ftova në stacionin policor për të dhënë intervistë lidhur me “uzurpimin e pronës publike”(vendosjen e dy bilbordeve të protestës së organizuar në Bujanoc). Kësaj nuk mund t’i thuhet ndryshe pos, zullum,” shprehet Kryetari i Këshillit Kombëtar Shqiptar, Nevzad Lutfiu, duke përfunduar:

“Të gjithë bashkëqytetarëve tanë që e festuan me maturi festën e Krishtlindjeve ortodokse, ja uroj festën. Shëndet e mbarësi.”