Maas përjashton mundësinë e riatdhesimeve të organizuara si vitin e kaluar

Ministri i Jashtëm i Gjermanisë, Heiko Maas, përjashton mundësinë e një fushate tjetër për riatdhesimin e pushuesve që eventualisht mund të bllokohen në ndonjë vend tjetër, për shkak të pandemisë COVID-19.

“Përkeqësimi i situatës me pandeminë COVID-19 në vende të caktuara, nuk duhet ta befasojë më askënd sot në vitin 2021, në ndryshim nga viti i kaluar, kur gjërat nuk diheshin,” tha Heiko Maas, për gazetat e grupit mediatik Funke duke shtuar se tani të gjithë e dinë dhe janë informuar mbi pasojat e mundshme të koronavirusit.

“Edhe organizatorët e udhëtimeve si dhe linjat ajrore kanë mundur të përshtaten me situatën”, theksoi ministri. Në rast urgjence, njerëzit ende mund të mbështeten në më shumë se 200 ambasada dhe konsullata gjermane në të gjithë botën. “Personat e bllokuar do të ndihmohen me këshilla dhe vepra konkrete, derisa nuk e gjejnë mundësinë më të mirë për t’u kthyer në shtëpi.”

Maas filloi një fushatë për kthimin në vend së bashku me organizatorët e udhëtimeve turistike me 17 mars 2020, pasi vitin e kaluar shumë njerëz mbetën jashtë vendit, për shkak të mbylljes së kufijve, për shkak të koronavirusit. Vitin e kaluar Gjermania ka kthyer në vend rreth 240.000 udhëtarë, përmes një “Ure ajrore”.

Problemet me pagesat

Organizatorët e udhëtimeve kanë kthyer vetëm personat që kanë paguar përmes tyre. Ndërsa autoritetet federale kanë organizuar kthimin e turistëve individualë dhe njerëzve të mbetur jashtë vendit. Për këtë u organizuan 260 fluturime me rreth 67.000 njerëz nga rreth 65 vende të ndryshme, deri në fund të prillit të vitit të kaluar. Agjencia DPA njofton se deri tani disa kosto nuk janë paguar nga personat që janë kthyer.

Kostot totale atëherë u vlerësuan në 93,8 milion euro. Rreth 40 përqind të kësaj shume është dashur ta paguajnë vet pëasagjerët. Deri në mars të këtij viti janë paguar në llogaritë bankare të qeverisëvetëm 17,9 milion euro.

Pushimet nuk ndalohen

Për sezonin e pushimeve verore, Maas u shpreh qartë:

“Ne mund të shpresojmë që jeta së shpejti do të kthehet në normalitet, nëse numri i infektimeve vazhdon të bjerë, ndërsa fushata e vaksinimit përparon. Por kjo nuk do të thotë që të gjitha kufizimet do të hiqen shpejt”.

Sidoqoftë, raporton DW, ministri i Jashtëm supozon se gjermanët do të jenë në gjendje të shkojnë me pushime përsëri në verë. Ai është i bindur se në pushime do të mund të shkojnë edhe personat që nuk janë vaksinuar kundër koronavirusit. Kjo, tha Maas, mund të realizohet me koncepte gjithëpërfshirëse të testeve dhe higjienës.