Macron: Autoritetet e Kosovës janë përgjegjëse! Kremlini: Mbështetje pa rezervë për serbët!
Për dallim nga aleatët e Kosovës që edhe sot vazhduan me kritika ndaj vendimit të Qeverisë së Kosovës për të vendosur kryetarët e rinj në katër komunat në veri, sot Kremlini zyrtar përmes zëdhënësit të saj Dmitry Peskov e ka bërë të qartë se Rusia mbështet Serbinë dhe serbët pa kushte, pa uruar as shërim për ata pjesëtarë të KFOR-it që pësuan nga kriminelët serbë.
Kështu, pas SHBA dhe BE, sot ishte vetë Presidenti i Francës, Emmanuel Macron, i cili i bëri përgjegjëse autoritetet e Kosovës për tensionimin e situatës në Kosovës ku u plagosën 30 ushtarë të NATO-s.
“Për situatën e krijuar është e qartë që ekziston përgjegjësia e autoriteteve të Kosovës, nuk po respektohet marrëveshja e arritur e cila është e rëndësishme, dhe është firmosur vetëm para disa javësh,” tha Macron në Bratisllavë ku po merr pjesë në Konferencën për Siguri Globale në Bratislavë, “Globsec”, duke përfunduar:
“I kemi thënë qartë autoriteteve kosovare se shpallja e zgjedhjeve ishte gabim!”
Por ndryshe nga perëndimorët, aleatja e Serbisë – Rusia, e cila u zbulua edhe me “Z”-të e saj fashiste që po përdorin kriminelët serb në protestat e veriut, nuk e çanë kokën për krimet e tyre të armatosura ndaj ushtarëve të KFOR-it, madje i inkurajon.
“Ne pa kushte mbështesim Serbinë dhe serbët. Konsiderojmë se duhet të respektohen të gjitha të drejtat dhe interesat e serbëve të Kosovës,” tha Peskov duke shtuar se nuk guxon të ketë hapësirë për aksione provokuese ndërsa pjesëmarrësit serb të protestave në Zveçan, Leposaviç e Zubin Potok sërish kërkuan tërheqjen e policisë dhe kryetarëve të rinj nga veriu, raporton Agjencia e lajmeve DPA.
Ndryshe, Kryeministri i Kosovës, Albin Kurti, duke fol sot në Konferencën për Siguri Globale në Bratislavë, “Globsec”, tha se nëse serbët në veri duan protesta paqësore, me kërkesë për zgjedhje të parakohshme, ata e kanë një kryeministër që është më shumë se i gatshëm t’i dëgjojë dhe ndoshta të pajtohet me ta.
Por, ai u shprehë qartë me këtë rast se nuk mund t’i urdhërojë kryetarët e rinj shqiptarë të komunave me shumicë serbe në veri të Kosovës, të kalojnë në zyra të tjera, jashtë objekteve komunale, ashtu siç kërkojnë serbët që kundërshtojnë kryetarët shqiptarë, por edhe e komunitetit ndërkombëtar, i cili thotë se ky veprim do t’i ulte tensionet.
