Macron: Evropa jonë mund të vdes!
Presidenti i Francës, Emmanuel Macron, ka bërë sot thirrje për një mbrojtje evropiane më të fortë dhe integruese, kontinenti nuk guxon të bëhet vasal i Shteteve të Bashkuara, tha ai, ndërsa foli për vizionin e një Bashkimi Evropian më të vendosur në skenën globale. Në fjalimin e shumëpritur për Bashkimin Evropian ai paralajmëroi se “Evropa jonë është e vdekshme dhe mund të vdes”.
Duke folur në Universitetin Sorbonne në Paris, presidenti 46 vjeçar tha se beteja për ndërtimin e një Evrope të fortë është shumë larg realizimit dhe se ekziston rreziku që Evropa të ngelet mbrapa rivalëve global në dekadën që kemi para.
Presionet ushtarake, ekonomike dhe presionet tjera, tha presidenti francez, mund ta dobësojnë unionin e 27 shteteve
“Evropa jonë sot është e vdekshme dhe mund të vdes. Mund të vdes dhe kjo varet vetëm nga zgjedhja jonë,” tha Macron duke vlerësuar se Evropa ndodhet në pikën e kthesës dhe duhet të bëjë më shumë që të ngelet në garë me rivalët global që me shpejtësi po armatosen.
“Rregullat e lojës kanë ndryshuar”
“Duhet të ndërtojmë një koncept strategjik të besueshëm të mbrojtjes europiane për veten tonë,” tha Macron. Gjithashtu paralajmëroi se ekziston rreziku që Evropa të ngelet mbrapa edhe ekonomikisht në kontekstin e parimeve globale të tregtisë së lirë, që konkurrentët e mëdhenjë e kanë vënë në dyshim, kështu që duhet të shqyrtohet modeli i saj i rritjes.
Evropa, tha ai, “nuk është e armatosur kundër rrezikut me të cilin po përballemi” në botë, ku “rregullat e lojës kanë ndryshuar”.
“Gjatë dekadës së ardhshme ekziston rreziku i madh që Evropa të dobësohet dhe të shtypet,” paralajmëroi Macron ndërsa i bëri thirrje Evropës që më në fund të zgjidhë statusin e “pakicës strategjike” të cilën e ka bërë të varur në Rusinë për shkak të enerjgetikës dhe në SHBA për shkak të sigurisë.
“Si mund ta ndërtojmë sovranitetin tonë, autonominë tonë, nëse nuk marrim përgjegjësinë për zhvillimin e industrisë sonë të mbrojtjes evropiane,” shtroi pyetjen Macron me mesazhin se Evropa “duhet të tregoj se nuk është vasal i SHBA dhe se dinë të bisedoj me të gjitha rajonet e botës”.
“Brexit njëra ndër krizat e pa precedent”
Si kërcënimin kryesor të sigurisë për Evropën e sheh luftën në Ukrainë. Macron tha se Rusisë nuk duhet lejuar që të fitoj në Ukrainë dhe bëri thirrje në forcimin e kapaciteteve evropiane të sigurisë kibernetike, lidhjes më të afërt të mbrojtjes me Britaninë pas Brexitit dhe krijimin e akademisë evropiane për aftësimin e personelit të lartë ushtarak.
“Kushti i cili është shumë i dimosdoshëm është që Rusia të mos fitoj në këtë luftë agresioni,” tha Macron. Për Rusinë gjithashtu tha se pas invazionit në Ukrainë po sillet pa hezitim dhe më nuk është e qartë se ku po tërheqë Moska “kufijtë” e saj të veprimit.
Brexitin e quajti njërën prej “krizave të pa precedent” me të cilën Evropa u përballë në vitet e fundit dhe se ishte “shpërthim, nga pasojat negative të të cilit sot askush nuk merr guximin të propozoj disa dalje, si nga Evropa ashtu dhe eurozona”.
