Macron i dërgon Ukrainës raketa me rreze të gjatë veprimi, kërcënon Kremlini

Pas vendimit të Presidentit të Francës, Emmanuel Macron, që ti dërgoj Ukrainës raketa me rreze të gjatë veprimi, SCALP, ka reaguar Kremlini duke e vlerësuar si një gabim i cili do të detyroj Rusinë në kundërmasa në konfliktin në Ukrainë.

“Nga këndvështrimi ynë ky është një vendim i gabuar, me pasoja serioze për palën ukrainase, sepse, natyrisht do të na detyroj që të ndërmarrim kundërmasa,” tha zëdhënësi i Kremlinit, Dmitrij Peskov.

Presidenti i Francës, Emmanuel Macron, sot në ditën e parë të Samitit të NATO-s në Vilnius, paralajmëroi se do ti dërgoj Ukrainës raketa me rreze të gjatë veprimi SCALP. Raketa Storm Shadow, që ushtria franceze e quan SCALP, është zhvilluar nga Britania e Madhe dhe Franca, dhe lëshohet nga ajri.

Mbretëria e Bashkuar ka paralajmëruar në muajin maj se do ti dërgoj Ukrainës raketa me rreze të gjatë veprimi. Vetëm disa ditë më pas, Rusia tha se ishte përballur me raketën Storm Shadow në konfliktin në Ukrainë.

Rrezja më e gjatë e veprimit të kësaj rakete është 250 kilometra, dhe është distanca më e gjatë e armëve që deri më tani i janë dërguar Kievit nga ana e shteteve perëndimore, duke i mundësuar ukrainasve që të arrijnë në zonat lindore në Ukrainë si dhe në Krime, e cila është nën kontrollin e forcave ruse.

“Përsëris, qëndrimi jonë është parimor në lidhje me vendime të këtij lloji për të dërguar armatim: vendime të këtij lloji nuk mund të ndikojnë në zhvillimin e ngjarjeve në Ukrainë,” tha Peskov duke shtuar “se ato vetëm mund të acarojnë fatin e regjimit kievas”.