Macron propozon ndryshim kursi të Evropës drejt Putinit, Kremlini: Jemi të impresionuar!
Presidenti francez, Emmanuel Macron, beson se Evropa duhet të flasë përsëri drejtpërdrejt me Presidentin rus, Vladimir Putin, për të gjetur një rrugë drejt paqes në Ukrainë.
Emmanuel Macron u tha disa gazetave evropiane, përfshirë gazetës gjermane Süddeutsche Zeitung dhe gazetës franceze Le Monde, se Evropa nuk duhet t’ia delegojë bisedimet me Rusinë Uashingtonit.
“Duhet të jetë e mundur të rifillojmë dialogun me Rusinë. Pse? Sepse ditën që arrijmë paqen, ajo paqe do të ndikojë edhe në Evropë,” tha presidenti francez në një intervistë që u botua sot.
“Ne kemi rifilluar kanalet e diskutimit në një nivel teknik,” tha ai.
Kush duhet të flasë me Putinin?
I pyetur nëse donte të ishte ai që do të fliste me Putinin, Macron tha se besonte se nevojitej një qasje evropiane e organizuar mirë, por se nuk duhet të ketë shumë palë të interesuara.
Kremlini thotë se Rusia është gati të rikthehet në dialog me Francën në nivel presidencial, raporton Agjencia gjermane e lajmeve, DPA.
Ndërkohë zëdhënësi i presidentit rus, Dmitry Peskov, thekson Agjencia ruse e lajmeve Interfax, thotë se ka pasur kontakte.
“Ka pasur kontakte, mund të konfirmojmë se, nëse është e nevojshme dhe e dëshirueshme, do të ndihmojmë në rivendosjen e dialogut në nivelin më të lartë sa më shpejt të jetë e mundur,” tha zëdhënësi i presidentit rus duke shtuar:
“Ne kemi thënë për një kohë të gjatë se është e palogjikshme, kundërproduktive dhe e dëmshme për të gjitha palët të ulin marrëdhëniet në zero.”
Duke folur për gatishmërinë e Macron për bisedime të drejtpërdrejta midis evropianëve dhe Putinit, Dmitry Peskov tha se kjo e impresionon Moskën.
Këshilltari i politikës së jashtme i Macron, Emmanuel Bonne, ishte së fundmi në Moskë, dhe kancelari gjerman Friedrich Merz tha në atë kohë se ishte një iniciativë e koordinuar.
Kur ishte hera e fundit që Macron dhe Putin folën?
Macron dhe Putin folën për herë të fundit në telefon më 1 korrik të vitit të kaluar, shkëmbimi i tyre i parë i pikëpamjeve në tre vjet. Zëdhënësi i Kremlinit tha gjithashtu se Rusia synon të kthehet në tryezën e negociatave sa më shpejt të jetë e mundur për t’i dhënë fund luftës në Ukrainë.
Nuk është caktuar ende një datë për bisedimet trepalëshe pasi palët ukrainase dhe ruse, të ndërmjetësuara nga Shtetet e Bashkuara, u takuan në Abu Dhabi javën e kaluar, shtoi Peskov.
Ministri i Jashtëm rus, Sergei Lavrov, tha për NTV se mbetet shumë punë për t’u bërë në bisedime.
