Mafia shqiptare e drogës, policia belge arreston 17 persona në Antwerp

Policia belge arrestoi 17 persona dhe sekuestroi drogë, para dhe armë gjatë bastisjeve që në shënjestër kishin dy grupe kriminale shqiptare në Antwerp. Njëri grup dyshohet se importonte kokainë dhe e pastronte, ndërsa tjetri përziente dhe transportonte sasi të mëdha droge, raporton e përditshmja belge Brussels Morning.

Gjithsej 12 kontrolle të shtëpive në Belgjikë dhe disa vende të tjera europiane, u kryen si pjesë e një hetimi të madh të drogës në Antwerp, ku çështja lidhet me një organizatë kriminale shqiptare.

Ku u zhvilluan bastisjet?

Bastisjet u zhvilluan në Antwerp, Schoten dhe Sint-Niklaas. Ato ishin një bashkëpunim mes policisë gjyqësore federale (FGP) dhe policisë lokale të Antwerp. Ata u përfshinë secili veç e veç në një hetim ndaj disa të dyshuarve shqiptarë. Kontrolle të shtëpive u bënë edhe në Gjermani, Francë, Itali, Holandë dhe Austri.

11 të dyshuar u kapën dhe gjashtë të tjerë ndodheshin jashtë vendit. Këta të fundit janë ende në pritje të dorëzimit të tyre të mundshëm në sistemin belg të drejtësisë. Gjatë kontrolleve u sekuestruan edhe 100 kilogramë drogë (kokainë dhe spid), armë zjarri, kimikate, 265 mijë euro kesh, madje edhe jelek antiplumb.

Seksioni i policisë lokale fokusohet në një grup kriminelësh që thuhet se specializohen në përzierjen e sasive të mëdha të drogës dhe më pas transportimin e tyre në vende të ndryshme duke përdorur automjete me hapësira të fshehura. Hetimi nisi në vjeshtën e vitit 2023 pas disa zbulimeve të hedhjes së paligjshme materialesh në Antwerp, ku u gjetën ambalazhe boshe kokaine dhe heroine, si dhe materiale të prodhimit dhe paketimit të drogës.

Cila bandë është e përfshirë?

Hetimi çoi në një bandë nga zona përreth qytetit shqiptar të Vlorës. Ajo thuhet se ka blerë sasi të mëdha kimikatesh për të përzier drogën dhe ua ka ofruar këto shërbime bandave të tjera (të huaja) të drogës. Gjatë hetimeve u kap drogë për banda të tilla në Holandë dhe Zvicër.

Hetimi i FGP-së ka nën shënjestër një bandë që thuhet se është e përfshirë në importin e kokainës nga vendet burimore të Amerikës së Jugut dhe funksionimin e një punishteje kokaine. Edhe ajo bandë vjen nga Vlora. Mësohet se edhe anëtarët e dy bandave njihen me njëri-tjetrin, por për momentin dy hetimet do të mbeten të ndara. Hetimi i dytë nisi gjithashtu në fund të vitit 2023, këtë herë pasi një shqiptar rezultoi se kishte shumë materiale inkriminuese në telefonin e tij gjatë një kontrolli policor në Antwerp. Hetimet e mëtejshme zbuluan edhe të dyshuar të tjerë, shumë prej të cilëve kanë lidhje familjare. Banda është e lidhur edhe me një grabitje të armatosur të një ngarkese me marijuanë me peshë 395 kg në mes të shkurtit në Bruksel.

Zyra e prokurorit publik dhe policia thonë se janë shumë të kënaqur me operacionin. “Kjo tregon vendosmërinë tonë për të luftuar organizatat kriminale dhe për të garantuar sigurinë në shoqërinë tonë,” tha prokurori i Antwerp Franky De Keyzer. “Disa nga të dyshuarit nuk ishin gati për gjykim, madje drejtuesit e grupit ishin dënuar me 10 deri në 12 vjet burg në vitin 2014 për vepra të ngjashme në Francë. Organizatat njihen edhe për krime të dhunshme. Gjëja më e rëndësishme është se bastisjet e mëngjesit të sotëm nga njësitë speciale të arrestimit të policisë federale dhe të Antwerp-it u zhvilluan pa incidente dhe siguria e policëve tanë nuk u cenua.”