Majko nuk votoi ligjin për teatrin, ja reagimi që merr nga regjisori i njohur…

Pandeli Majko, ministër i Shtetit për Diasporën, nuk votoi në seancën e djeshme për ligjinmbi Teatrin, që i hap rrugë shembjes së godinës aktuale dhe përcakton ndërtimin e një godine të re, por të shoqëruar me 6 kulla shumëkatëshe. Sipas ligjit, i gjithë projekti i është dhënë firmës FUSHA shpk.

Majko ka pasur një debat me Ramën pak minuta para takimit, ndërsa Kryeministri i ka kërkuar të largohet nga seanca nëse ai voton kundër. Në fakt, Majko nuk ka marrë pjesë në votim, çka do të thotë se ai i ka qëndruar vendimit të rreth 20 viteve më parë, kur bllokoi idenë e Edi Ramës, për të shembur Teatrin Kombëtar.

Sipas deputetëve të pranishëm në sallë, të cilët kanë dëgjuar debatin, Rama i është drejtuar Majkos me tone të larta: “Nëse s”do votosh, ik në shtëpi. Mua mos më bëj numra”. Pas këtij debati, i cili është filmuar nga kamerat, Pandeli Majko është parë i nervozuar. Pasi ka vënë telefonin në vesh, është larguar nga salla, ndërkohë që Rama e ka shoqëruar largimin e tij me një gjest.

Qendrimi i Majkos është përshëndetur nga regjisori Kastriot Çipi, i cili me një shënim në faqen e tij në Facebook e ka falenderuar publikisht.

“Faleminderit Pandeli Majko! Të paktën ti nuk u bëre viç për lëkurë! Të presim në sheshin e Teatrit, në sheshin Demokracia!”, shkruan Çipi.