Malajzia heq vizat për qytetarët e Kosovës

Malajzia ka vendosur t’i heqë vizat për shtetasit e Kosovës për udhëtime të shkurtra, njoftoi sot Presidentja e Kosovës, Vjosa Osmani.

Qytetarët e Kosovës mund të udhëtojnë në Malajzi pa viza për qëndrime jo më të gjata se 30 ditë, theksoi Osmani, duke njoftuar gjithashtu se do ta vizitojë vendin e Azisë juglindore javën e ardhshme.

Ajo e cilësoi këtë si hap të rëndësishëm dhe zbuloi se Kosova do të hapë Ambasadën e saj në Kuala Lumpur gjatë vizitës së saj.

“Ky është një tregues i qartë se lidhjet mes dy vendeve tona po forcohen çdo ditë e më shumë. Shpreh mirënjohjen time të sinqertë ndaj institucioneve malajziane për këtë vendim domethënës”, tha ajo përmes rrjetit social X.

Ndërkohë, ministrja e Jashtme në detyrë e Kosovës, Donika Gërvalla, tha pak orë më vonë pas njoftimit të Osmanit se vendimi i Malajzisë është “dëshmi konkrete e avancimit të subjektivitetit ndërkombëtar të shtetit tonë dhe forcimit të lidhjeve dypalëshe”.

“Republika e Kosovës mirëpret këtë hap pozitiv dhe shpreh mirënjohjen ndaj institucioneve malajziane për bashkëpunimin dhe mbështetjen e vazhdueshme në shërbim të qytetarëve dhe lidhjeve bilaterale gjithnjë e më të fuqishme në mes të dy vendeve tona”, tha ajo.

Malajzia ishte në mesin e vendeve të para që njohu pavarësinë e Kosovës kur Prishtina e shpalli atë në vitin 2008.

Ndryshe, tani kosovarët mund të udhëtojnë pa viza në 53 shtete të botës, ndërsa në 37 vende mund të pajisen me viza sapo të mbërrijnë.

Deri tani, Malajzia ka qenë në mesin e 38 vendeve të botës ku kosovarët detyrohen të pajisen me vizë pasi të kenë mbërritur në vendin e vizitës.