Mali i Zi largon Ambasadorin e Serbisë nga Podgorica, Beogradi zbaton reciprocitetin: Shpall…

Pasi Ministria e Punëve të Jashtme e Malit të Zi shpalli sot Ambasadorin e Serbisë në Podgoricë, Vlladimir Bozhoviç, person non grata dhe i kërkoi që të largohet nga territori malazez, MPJ e Serbisë bënë të ditur se ka zbatuar reciprocitetin dhe Ambasadorin e Malit të Zi në Beograd, Tarzan Millosheviç e ka shpallur gjithashtu person non grata!.

Në notën diplomatike që Ministria e Punëve të Jashtme të Serbisë i ka dërguar asaj të Malit të Zi, theksohet se bazuar në Nenin 9. të Konventës së Vjenës mbi marrëdhëniet diplomatike, Ambasadori Millosheviç shpallet person non grata, raporton Agjencia shtetërore serbe e lajmeve Tanjug.

“Ambasadori Millosheviç detyrohet brenda 72 orëve të largohet  nga territori i Serbisë,” thuhet në notën diplomatike serbe.

Nuk dihet pse heshtë Brukseli zyrtar, por në rastin kur Kosova zbatoi reciprocitetin ndaj Serbisë, Përfaqësuesi i Lartë për Politikë të Jashtme dhe Siguri pranë BE, Josep Borrell, preokupim kryesor të diplomacisë evropiane kishte heqjen e reciprociteti në qarkullimin e mallrave që përdorte Prishtina zyrtare ndaj bllokimit të mallrave kosovare nga shteti serb.

Ndryshe, Ministria e Punëve të Jashtme e Malit të Zi e ka shpallur sot Ambasadorin e Serbisë në Podgoricë, Vlladimir Bozhoviç, person non grata dhe i ka kërkuar që të largohet nga territori malazez, pas ndërhyrjeve të gjata dhe në vijimësi, në punët e  brendshme të Malit të Zi, sjelljeve dhe deklaratave që nuk kanë të bëjnë me standardet e zakonshme dhe të pranueshme të detyrës së diplomatit, si dhe pas disa vërejtjeve me gojë dhe me shkrim për sjellje të papranueshme.