Mali i Zi, nga 22 Maji pa maska në ambient të hapur

Nga e shtuna, 22 Maj 2021, në Mal të Zi hiqet detyrimi i mbajtjes së maskës në ambient të hapur, aty ku e ekziston mundësia e krijimit të distancës prej 2 metrave. Detyrimi i mbajtjes së maskës në ambient të mbyllur mbetet në fuqi, tha Seketari i shtetit në Ministrinë e Shëndetësisë, Dr.Borko Bajiç duke saktësuar se këto masa vlejnë deri më 28 Maj.

“Kjo është e vetmja risi, mbajtja e maskës ngelet në fuqi ashtu si dhe masat tjera. Me miratimin e ndryshimeve në Ligjin mbi mbrojtjen e popullsisë nga sëmundjet infektive, do të gjobitet mosmbajtja e maskës kur pritet në radhë para institucioneve, siç janë bankat, postat etj.” tha Bajiç duke saktësuar se kjo gjobë do të jetë 30 euro.

Ndërkohë kushtet e shtetasve të huaj për tu futur në Mal të Zi nuk kanë ndryshuar.

“Vetëm shtetasit e vendeve fqinje, Shqipërisë, Kosovës, Serbisë, Kroacisë, Bosnje Hercegovinës, si dhe Rusisë, Ukrainës dhe Bjellorusisë, në Mal të Zi futen pa asnjë kusht. Të gjithë të tjerët duhet të kenë testin negativ PCR ose dëshminë se kanë antitrupa ose dëshmi se janë imunizuar të paktën 7 ditë para futjes në Mal të Zi me çfarëdo lloj vaksine kundër koronavirusit,” tha Bajiç duke mos saktësuar se kur do të mbërrijë vaksina ruse Sputnik V, e meqë kontratat janë sekrete, nuk tha dot nëse Rusia do të ketë pasoja për vanesa në furnizim.

Me këtë rast, Drejtori i Institutit të Shëndetit Publik, Dr Igor Galiç, tha se niveli i infeksioneve është në nivelet më të ulëta nga korriku i vitit 2020.

“Mesatarja e rasteve të reja me koronavirus në javën e fundit ishte 76 dhe shënon rënie konstante nga muaji mars,” tha Galiç ndërsa nga 1.302 testime mesatare gjatë javës së fundit 5.83 për qind prej tyre rezultuan pozitiv. Aktualisht, tha ai, 1.243 janë raste aktive, ndërsa numri i të infektuarve është ulur për 10 herë.

Ndryshe, deri më 19 Maj në Mal të Zi janë dhënë 151.522 doza të vaksinës prej të cilave vetëm me dozën e parë janë imunizuar 116.481 qytetarë ndërsa komplet janë vaksinuar 35.041 persona.