Mali i Zi, pjesëmarrja në zgjedhje 75.9 %. Rezultati pritet të dal…

Sot në Mal të Zi në zgjedhjet për parlamentin e ri kanë votuar 409.880 qytetarë ose 75.9 për qind ka bërë të ditur Qendra për Tranzicion Demokratik, CDT, duke shtuar se në zgjedhjet parlamentar të vitit 2016 pjesëmarrja ishte 73.4 për qind, e në vitin 2012 ishte 70.6 për qind. Në garën për 81 ulëse në parlament janë 11 lista zgjedhore, 5 parti dhe 6 koalicione.

Në këtë garë janë dhe dy koalicione shqiptare: Koalcioni shqiptar ”Bashkë nji za” listë të cilës i prin Fatmir Gjeka dhe Lista Shqiptare Genci Nimanbegu – Nik Gjeloshaj të cilës i prin Nik Gjeloshaj.

Presidenti i Malit të Zi, Millo Gjukanoviç, tha pas votimit se nuk ka rrezik për stabilitetin e shtetit dhe sigurinë e qytetarëve, ndërsa tensionet, sipas tij, vijnë nga adresa jashtë Malit të Zi.

“Shoqëria malazeze ka kaluar nëpër tundime të tilla disa herë, andaj nuk shoh ndonjë rrezik për stabilitetin e Malit të Zi dhe për sigurinë e qytetarëve,” tha Gjukanoviç.

Ndryshe, të drejtën e votës në Mal të Zi e kanë 540.026 qytetar të cilët kanë votuar në 1.217 qendra votimi.

Qendrat e votimit janë hapur në orën 7:00 ndërsa janë mbyllur në orën 20:00. Rezultati paraprak pritet të dal deri në orën 22:00