Mali i Zi refuzon ta ekstradojë një të dyshuar për krime lufte në Kosovë
Ministri i Drejtësisë i Malit të Zi, Marko Kovaç, ka refuzuar ta ekstradojë në Kosovë shtetasin serb Momçilo Vukotiç, 61 vjeç, i dyshuar për krime lufte në territorin e Pejës në vitin 1999.
Kushtet ligjore për ekstradim janë plotësuar, konfirmoi Ministria malazeze për RFE., por ministri Kovaç e refuzoi ekstradimin e tij, pasi mendon se është shkelur Konventa Evropiane për të Drejtat e Njeriut.
“Në vendimin e Prokurorisë Speciale të Kosovës për fillimin e hetimeve, nuk thuhet se cilat veprime i ka bërë Vukotiç, të cilat janë pjesë e veprave penale, por thuhet se pas 24 vjetësh, gjoja është paraqitur një dëshmitar i cili e ka njohur atë nga fotografia e tij në një album,” u shpreh ministria Drejtësisë e Malit Zi.
Vukotiç u arrestua më 25 shtator dhe ndaj tij u caktua masa e paraburgimit ekstradues.
Ai kërkohej nga Interpoli përmes Misionit të Kombeve të Bashkuara në Kosovë, UNMIK, nën dyshimin për krime lufte kundër popullatës civile.
Kosova nuk ka lidhje direkte me Interpolin, por komunikon me të përmes UNMIK-ut.
Pas arrestimit të tij, një nga liderët e Frontit Demokratik pro-rus dhe pro-serb të shpërbërë së fundmi, Milan Knezheviç, i bëri thirrje qeverisë teknike të Dritan Abazoviçit që të mos marrë pjesë në arrestimin e serbëve dhe malazezëve të shpërngulur nga Kosova.
“Kjo do ta destabilizojë më shumë situatën tashmë të keqe politike në Mal të Zi,” tha Knezheviç duke i bërë thirrje të gjithë serbëve dhe malazezëve të shpërngulur që ndodhen në Mal të Zi ta kontaktojnë partinë e tij, në mënyrë që t’u ofrohet çdo lloj ndihme dhe mbrojtje.
Knezheviç tha se në bazë të kërkesës së Prishtinës, dy serbë të zhvendosur në Mal të Zi, Zhivko Vuksanoviç dhe Momçilo Bulatoviç, u arrestuan për krime të dyshuara lufte pas dy dekadash e gjysmë.
Ai i vlerësoi arrestimet e këtyre personave, raporton RFE, si “terror ndaj popullit serb që po tenton të përhapet në Mal të Zi”.
Ndryshe, që nga përfundimi i luftës në Kosovë, rreth 70 persona janë dënuar për krime lufte para institucioneve vendore dhe ndërkombëtare.
Nga viti 2000 deri në vitin 2008, krimet e luftës në Kosovë u hetuan nga Misioni i Kombeve të Bashkuara, ndërsa nga viti 2008, Misioni i Bashkimit Evropian për Sundimin e Ligjit ishte përgjegjës për hetimet e krimeve të luftës.
Në vitin 2018, ky mision ka dorëzuar dokumente në Prokurorinë e Kosovës dhe në gjykatat vendore.
Dhjetë ditë pas Vukotiçit, në Mal të Zi u arrestua edhe shtetasi i Kosovës me inicialet I.B. 48 vjeç, i dyshuar për krime lufte në Kosovë.
