Mali i Zi, zgjedhjet presidenciale të dielën ato parlamentare më 11 Qershor

Dy ditë para zgjedhjeve presidenciale dhe një ditë pasi firmosi dekretin për shpërndarjen e parlamentit, Presidenti i Malit Zi, Milo Gjukanoviç, shpalli 11 Qershorin si ditën e zgjedhjeve të jashtëzakonshme parlamentare.

“Duke u bazuar në Nenin 92 Pika 5, kam marrë vendim që të shpall zgjedhjet parlamentare më 11 Qershor,” tha sot Gjukanoviç duke shtuar se si gjithmonë ka respektuar vetëm Kushtetutën. 

“Liderët të cilët kanë theksuar se kanë shumicën, nuk i janë përgjigjur thirrjes për konsultime. Për këtë arsye sot, ashtu si edhe më parë, jam i bindur se zgjidhja më e mirë është ndërpreja e mandatit dhe shpallja e zgjedhjeve të jashtëzakonshme parlamentare,” tha Milo Gjukanoviç duke shtuar se si President kishte kërkuar dhe mendimin e Komisionit të Venecias.

Ndryshe, në garën për Presidentin e Malit të Zi që zhvillohet të dielën më 19 Mars, përveç Milo Gjukanoviçit nga partia e tij e Demokratëve Socialist, DPS, janë dhe lideri i Frontit Demokratik proserb, DF, Andrija Mandiç, përfaqësuesja e Partisë Socialdemokrate, SDP, Draginja Vuksanoviç Stankoviç, kryetari i Demokratëve Aleksa Beçiç, Jakov Milatoviç nga Lëvizja Europa Tani, PES, lideri i Malit të Zi të Bashkuar, Goran Daniloviç dhe kandidati Jovan Raduloviç.

Sondazhet tregojnë se të dielën do të përcaktohet rivali i Milo Gjukanoviçit për raundin e dytë i cili do të mbahet më 2 Prill, dhe luftë e fortë do të zhvillohet në mes të ish-ministrit të Ekonomisë, Jakov Milatoviç, i cili u bë i njohur me rritjen e pagës minimale nga 220 në 450 euro dhe afirmitetin e dëshmuar me Kishën Ortodokse Serbe kur u bë dh eministër në Qeverinë Krivokapiç, dhe, liderit të Demokratëve dhe ish-kryetarit të Parlamentit të Malit Zi, Aleksa Beçiç, që gëzon dh embështetjen e kryeministrit aktual, Dritan Abazoviç.