Mali Zi, diplomati rus shpallet NON GRATA

Ministria e Punëve të Jashtme e Malit të Zi shpalli NON GRATA diplomatin e Ambasadës së Federatës Ruse në Malin e Zi.

Nota formale për këtë vendim, thekson ministria e Jashtme e Malit Zi, ku thuhet se diplomati në fjalë ka afat prej 72 orësh ta braktis vendin, i është dorëzuar sot Ambasadorit të Rusisë.

“Arsye për marrjen e këtij vendimi është vlerësimi i organeve përkatëse të sigurisë në Mal të Zi mbi aktivitetet e diplomatit, që janë në kundërshtim me Konventën e Vjenës mbi marrëdhëniet diplomatike,” thuhet në komunikatën e Ministrisë së Punëve të Jashtme të Malit Zi.

Ndërkohë mediat malazeze, duke ju referuar burimeve policore, raportojnë se personi i shpallur NON GRATA nuk është diplomat por agjent i shërbimit sekret rus, SVR, dhe quhet Viktor Antipin.

Veprimtaria e spiunit rus Antipin nuk është e panjohur për opinionin malazez, madje vetëm dy javë më parë mediat kanë raportuar se ai është takuar në një pub në Danilovgrad me kryesuesin e Parlamentit të Malit Zi dhe anëtarin e partisë proserbe dhe proruse, DF, Strahinja Bulajiç, i cili aktualisht po bllokon ndryshimet demokratike në këtë vend me refuzimin për të thirrë seancën parlamentare ku do të krijohej shumica e re parlamentare nga pakicat e cila tashmë është zyrtarizuar.

Ndryshe, pas shpalljes NON GRATA të spiunit rus Viktor Antipin dhe konfirmimit të Strahinja Bulajiçit se është zhvilluar takimi, si dhe pas bisedës që zhvilloi Presidenti i Malit Zi, Milo Gjukanoviç, me të Dërguarin e Posaçëm të SHBA për Ballkanin Perëndimor, Gabriel Escobar, që pasoi me mandatimin e Dritan Abazoviç pë Kryeministër të ri, pritet që qëndrimet e Bulajiçit të paktën ndaj Kushtetutës të jenë korrekte dhe ligjore!